" శ్రీ విష్ణుచిత్త కులనందన కల్పవల్లీం
శ్రీ రంగనాథ హరిచందన యోగ దృశ్యాం
సాక్షాత్ క్షమాం కరుణయా కమలామివాన్యాం
గోదామనన్య శరణం - శరణం ప్రపద్యే"
ఓం నమో నారాయణాయ-3
**********************
విచిత్రముగ నామది " శ్రీ విల్లి పుత్తూరు" గా మారినది
"విష్ణుచిత్తీయమై" శ్రీహరి నామ సంకీర్తనమే కోరుతోంది.
పునీతులు-గోపికలు పురుషార్థ ప్రదమైన
పుణ్య స్నానములు చేయుచున్న తీర్థములలో
నింగి-నేల స్నేహముతో హితము రంగరించినదైన
పల్లెతల్లి పులకింతల పచ్చని పంట పొలములలో
నింగి-నేల-జలము దాగుడుమూతలాడుచున్నవైన
పారుచున్న సరసులోని చేపల కేరింతలలో
మరుగుజ్జు రూపమున ముజ్జగములు కొలిచిన వాడైన
ఆ వామనమూర్తి త్రివిక్రమ పరాక్రమములో
తెల్లవార వచ్చెనమ్మ చెలులారా రారె
తెల్ల బరచగ భక్తిపూల మాలలతో నేడె.
భావము
పుష్కర తీర్థములలోను,పంట పొలములలోను,వాటి మధ్యనున్న సరసులలో ఆడుచున్న చేపలలోను,మరుగుజ్జు రూపములో యాచకునిగా మారి ముజ్జగములను కొలిచిన వామన మూర్తి పరాక్రమములోను నిమగ్నమైన నా మనసు,మీ అందరితో కలిసి, పాశురములను కీర్తించుచు,భక్తి పువ్వులను,శరణాగతి అను దారముతో అల్లిన హారములను, స్వామికి సమర్పించుటకు, చెలులారా!త్వర త్వరగా కదిలిరండి.తెల్లవారు చున్నది.
( ఆండాళ్ తిరువడిగళే శరణం
