ఏకములో అనేకమే గురువు-పూజిద్దాము.
***************************************
శ్రీ గురుభ్యో నమ:
**************
భావి సౌభాగ్యమనే బలమైన సౌధమునకు
కీలకమైన మూలధనము మీరు
ఊపిరి అందిస్తున్న ఉపాధ్యాయులారా
ప్రవాసాంధ్ర ప్రకాశిత ప్రాభవ జ్యోతుల్లారా
వందనము- అభివందనము.
అసతోమా సర్గమయా.
-------------------------
దేశాభివృద్ధి " నాది " అను బాధ్యత "పునాది" పై
ఆటు పోటు తట్టుకునే దీటుతనపు " ఇటుకలను" పేర్చి
ఈసు ఇసుమంతయు గానరాని ఇంగితపు "ఇసుక" చేర్చి
ఐకమత్యమే బలము అను సెంటిమెంటు " సిమెంటు " తో
వీడలేని దేశభక్తి" గోడలను" కట్టిస్తున్న
శాస్త్రములు అందిస్తున్న " మహనీయ మేస్త్రీలు"
వందనము- అభివందనము
తమసోమా .జ్యోతిర్గమయా
-------------------------
కలకాలము కలపాలి అను భావపు "కలప"తో
మంచి తలపులనే తలుపులను,కిటుకులనే కిటికీలను
చెక్కు చెదరని ధైర్యమనే చెక్క పనిముట్లను
కుసంస్కారపు" చెద" చేరకూడదనే తలపుతో
చెక్క చక్కదనానికి చిత్రీలు పట్టిస్తున్న
చాకచక్యము అందించే " వదాన్యపు వడ్రంగులు "
వందనము-అభివందనము.
-మృత్యోర్మా అమృతంగమయా.---------------------
ఆపాత మధురముగా పూజ్యభావము" కప్పు" కొనగా
లలిత కళా తోరణములను,సన్మానపు శాలువలను
లేతవైన మెదడులను, "జాతీయ పతాకను "
మాయా మర్మములు ఎరుగని" మానవతా-తాను" ను
" చిమటలు" కొట్టనీయకుండ చేతలు అనే దారముతో
నేతలను నేస్తున్న " చేనేత కళాకారులు " మీరు.
వందనం-అభివందనం.
-- నమోనమః శ్రీ గురుపాదుకాభ్యాం.-----------------
పసిమనసుల పసిడిని పుటము వేయు" కంసాలులు "
కాసేపు" కుమ్మరులు,"కాసేపు" కమ్మరులు", ,
అన్నీ మీరేనుభిన్నత్వపు బాటలలో " ఏకత్వము " చాటుతారు
ఏక కాల బోధనలో " అనేకము " సాధించగలరు
" ప్రతిభ " అభ్యున్నతి చెందిన ప్రతి ఒక "ఇతివృత్తములో "
ప్రకాశిస్తుంటాడు " ప్రత్యక్షముగా గురువు "
గురుపాదములపై లగ్నముచేయని మనసా!
ఇప్పటికైనా మార్చుకో నీ పద్ధతి.
మనస్సే నలగ్నం గురోరంఘ్రిపద్మే-తత: కిం తత: కిం తత: కిం తత: కిం ????
********************************************************************
( శ్రీ సర్వేపల్లి రాధాకృష్ణన్ గారికి నివాళి.)
