ఓం నమ: శివాయ-65

   శివ సంకల్పము-65

మరునిశరము పూవుగా నిను మనువాడమని
మదనుడు అనగానే గౌరీపతివి అయ్యావు

క్షీర సాగర మథనములో విషము స్వీకరించమని
అర్థాంగి అనగానే గరళకంఠుడివి అయ్యావు

గంగ వెర్రినెత్తిమీద సుతిమెత్తగ మొత్తమని
భగీరథుడు అనగానే గంగాధరుడివి అయ్యావు

గంగిరెద్దు మేళములో నీకు రంగు వస్త్రము తానని
కరిరాజు అనగానే గజ చర్మధారివి అయ్యావు

భృంగి సైగచేయగానే నీ సింగారపు నాట్యమట
"సంధ్యారంభిత విజృంభితవు" నీవు కావని

"సం జ్ఞారంభిత విజృంభితుడవు" పాపం నీవని
పెక్కు మార్లు విన్నానురా ఓ తిక్క శంకరా .  

ఓం నమ: శివాయ-66

శివ సంకల్పము-66

 నీలి మేఘమే నీవనుకుని నేను చాతకమై చూశారా

 నీలి గరళము నన్నుచూసి గేలిచేసిందిరా

 సూర్యాయ దక్షాధ్వర  అనివిని నేను చక్రవాకమై కదిలానురా

 మంచుకొండ నన్నుచూసి గేలిచేసిందిరా

 చంద్ర శేఖరుడివని నేను చకోరమై కదిలారా

 దీప,ధూపముల వేడి నన్ను గేలిచేసిందిరా

 నటరాజువి నీవని నేను నెమలిగా చేరానురా

 భృంగి కన్ను నన్నుచూసి గేలిచేసిందిరా

 శుభకరుడివి నీవని నేను గరుడినిగా వాలారా

 కంచి గరుడ సేవకు సమయము మించిందన్నారురా

 భ్రమలను తొలగించలేని భ్రమరాంబికాపతి

 ఇక్కట్లేనురా చూడర ఓ తిక్క శంకరా.

ఓం నమ: శివాయ-67

శివ సంకల్పము-67

 వెండికొండ దేవుడవని వెండికొరకు నే వస్తే

 దండిగా ఉన్న మంచు వెండి వెండి నవ్వింది

 మేరుకొండ విల్లుందని మేరువుకై నే వస్తే

 చాటుగా ఉన్న విల్లు చిలిపిగా నవ్వింది

 రాగి జటాజూటమని రాగి కొరకు నే వస్తే

 విరాగి జట ఎంతో విచిత్రముగా నవ్వింది

 నీల లోహితుడవని ఇనుముకై నే వస్తే

 చాల్లే అంటూ విషము గేలిగా నవ్వింది

 కుబేరుడు చెంతనున్నాడని ధనమునకై నే వస్తే

 చేతులు కట్టుకున్నానని చేతగాక నవ్వాడురా

 చిక్కులు విడదీయవేరా ఓ తిక్క శకరా. 

 చిక్కులు విడదీయవేర ఓ తిక్క శంకరా.

ఓం నమ: శివాయ-68

  శివ సంకల్పము-68

  చేతులార పూజసేయ చెంతకు రావాలంటే

  చెట్టువు కమ్మంటావని చెప్పలేని భయం

  కనులారా దర్శించి కొలవాలనుకుంటేను

  కుక్కవు కమ్మంటావని ఎక్కడో భయం

  పాహి అంటు పాదములు పట్టుకోవాలనుకుంటే

  పాముగ మారమంటావని పాపిష్టి భయం

  తోడుగ ఉందమని వేడుకోవాలనుకుంటేను

  కోడివి కమ్మంటావని నీడలా ఏదోభయం

  హర హర మహదేవుడని వరము కోరుకోవాలంటే

  శరభము కమ్మంటావని నరనరములలో భయం

  అభయము అడగాలంటే అడుగడుగున భయము నాకు

  మొక్కవోని ధైర్యమీయరా ఓ తిక్క శంకరా.

ఓం నమ: శివాయ-69

 శివ సంకల్పము-59

 నీకు మల్లే నీ నామమునకు నిలకడలేదురా శివా

 పెదవులు తెరుచుకోగానే పదమని పరుగెడుతుండి

 శంభో అని పిలువగానే అంభోరుహము చేరుతుంది

 శివ శివ అని పిలువగానే శిఖరాగ్రమును చేరుతుంది

 మహాదేవ అని పిలువగానే తుహినముగా మారుతుంది

 నీలగ్రీవ అని పిలువగానే వినీల గగనము అవుతుంది

 విశ్వనాథ అని పిలువగానే విశ్వమంత తిరుగుతుంది

 ఈశ్వరా అని పిలువగానే ఈడ ఉండనంటుంది

 ఉమాపతి అని పిలువగానే ఉరకలు ఆపేసింది

 పశుపతి అని పిలువగానే వశమయ్యాను అంది

 ఎవరేమని పిలిచినా ఎక్కడికి పోవద్దని దానికి

 ముక్కుతాడు వేయరా ఓ తిక్క శంకరా. 

ఓం నమ: శివాయ-70

శివ సంకల్పము-70

 నీ పిరికితనము చూసి నీ నామము భయపడింది

 ఎందుకైన మంచిదని పొంచి పొంచి దాగినది

 రెండు వేదముల మధ్య యజుర్వేదమును పెట్టింది

 యజుర్వేద మధ్యలో రుద్రాధ్యాయమును

 అష్టమ వాకము రక్షణ అని స్పష్టము చేసినది

 రక్షణదాయినిగా పంచాక్షరిని పట్టుకుంది

 పంచాక్షరి మధ్యములో పదిలముగా కూర్చుంది

 రెండక్షములను దాచలేని దైవము నీవేనంది

 పంగనామము పెడతావని నీ నామము అనుకుంటోంది

 గంగపాలు చేస్తావేమో నన్ను నీ చేతకానితనముతో

 ఇన్నాళ్ళు నమ్ముకున్న నన్ను ఇప్పుడు కాదంటే నేను

 ఎక్కడికి పోతానురా ఓ తిక్క శంకరా.

ఓం నమ: శివాయ-71

  శివ సంకల్పము-71
 చీమలు పెట్టిన పుట్టలను  నీ పాములు దోచేస్తున్నాయిరా
 తేనెను చేర్చిన పట్టును నీ భృంగి దోచేస్తున్నాడురా

 కోతకు వచ్చిన పంటను నీ శిగగంగ ఎత్తుకెళ్తోందిరా
 వాటితో పోటీగా నీ చేతివాటము చూపిస్తున్నావురా

 వేటిని వదలకుండ దాటించేస్తున్నావురా
 ప్రళయమనే పేరుతో ప్రపంచాన్నే దోచేస్తున్నావురా

 ఓం నమఃచోరాయచ అని అన్నదే తడవుగా
 ఓనమాల ఆనవాలు ఓంకారము దోచేస్తున్నదిరా

 నేరమేమి కాదంటున్న దొంగతనపు దొరవు నీవు
 రాబడి సరిపోయిందని నీ దోపిడిని ఆపకుంటే

 సకల జనులు సతమవుతున్నారు, సంపదలను
 దక్కనీయమోనని ఓ తిక్క శంకరా.

ఓం నమ: శివాయ-72

 శివ సంకల్పము-72

 శ్రీ కాళి విశ్వేశ్వరాలయములో స్ఫటికలింగ సామివి

 కాళేశ్వర క్షేత్రములో రెండు లింగాల సామివి

 భీమేశ్వర క్షేత్రములో రెండు రంగులున్న సామివి

 కొత్త కొండ క్షేత్రములో కోరమీసాల సామివి

 కాకాని క్షేత్రములో కరుణామయ లింగసామివి

 కోటప్ప కొండలో త్రికూటేశ్వర సామివి

 అమరావతి క్షేత్రములో అతి పొడుగు సామివి

 పలిమెల క్షేత్రములో కొప్పు లింగేశ్వర సామివి

 గుడిమల్లన్న క్షేత్రములో పురుషాంగపు సామివి

 శ్రీపల్లి కొండేశ్వరములో శయనించిన సామివి

 విరూపాక్షపురములో అర్థనారీశ్వర సామివైతే

 ఎక్కడరా నీ మూలము ఓ తిక్క శంకరా.

ఓం నమ: శివాయ-73

 
     శివ సంకల్పము-73

 నారాయణుడు అలరారాడు అవతారాలతో
 వాసుకి అనుసరించాడు అవతారాలతో

 ఆదిశక్తి అనుగ్రహించె అనేక అవతారాలతో
 అమరెగా ఆయుధాలు తాము అవతారాలతో

 ప్రతిజీవి పయనము పదే పదే అవతారాలతో
 యక్ష,గంధర్వులు వచ్చారు ఎన్నో అవతారాలతో

 కాల పురుషుడు కనిపిస్తున్నాడు ఆరు అవతారాలతో
 భక్తులు సేవిస్తున్నారు సరికొత్త అవతారాలతో

 భవతారణ కారణాలుగా ఎన్ని అవతారాలో
 కలియుగమున కానలేము కరుణ అవతారము,నీవు

 అవతారాలెత్త లేక అంశతో సరిపెట్టుకున్నావంటే నీకు
 ఉక్రోషము లేదురా ఓ తిక్క శంకరా.

ఓం నమ: శివాయ-74

   శివ సంకల్పము-74

 నవ విధ భక్తుల కొలువగ నారాయణుడివి కావు
 నవ రత్నముల కొలువగ నారాయణివి కావు

 నవరాత్రులు కొలువగ నగజాతవు కావు
 నవనీతముతో కొలువగ నగధరుడివి కావు

 నవధాన్యముల కొలువ నవ గ్రహములు కావు
 నవ కలశమున కొలువగ దివ్య జలమువు కావు

 నవమినాడు కొలువగ నవమి పుట్టినవాడవు కావు
 నవనాడుల కొలువగ ఆత్మారాముడివి కావు

 నవమాసములు కొలువగ కన్నకొడుకివి కావు
 ఎవరివో ఏమో నీవు ఎన్నలేముగ మేము

 ముక్కంటివి అంటుంటే ముక్కోటి అంటూంటే నాలో
 పెక్కు ప్రశ్నలేనురా ఓ తిక్క శంకరా.

ఓం నమ: శివాయ-75

 శివ సంకల్పము-75

నిన్నసలింతయు లెక్కచేయడుగా ఆ దక్షమహారాజు

నీ కళ్యాణపు కర్తయైనాడుగా ఆ రతిరాజు

నీ సేమపు మామయైనాడుగా ఆ హిమరాజు

నీ తలపై కొలువైనాడుగా ఆ నెలరాజు

నీ వంటికి తను వస్త్రమైనాడుగా ఆ కరిరాజు

నీ కంఠపు కంటెగ మారినాడుగా ఆ భుజగరాజు

నీ మ్రోలన్ కొలువైనాడుగా ఆ వృషభరాజు

నీతోబాటుగా తాను కూర్చుండెగా ఆ యమరాజు

విరాజమానుడివి అన్నా నువు రాజువి కాదని

ఇందరు రాజులు మందహాసముతో నిన్ను ఆడింపంగా

నటరాజు-అను ఒక రాజును నీకొసగిరి నీ

తక్కువ చాటేందుకురా ఓ తిక్క శంకరా

ఓం నమ: శివాయ-76

ఓం నమ: శివాయ -76

"గంగాధర" అని పిలువగ గంగ తొంగి చూస్తుంది

"ముక్కంటి" అని పిలువగ తిక్క కన్ను పలుకుతుంది

"శశిశేఖర" అని పిలువగ జాబిలి ఊకొడుతుంది

"కపర్ది"' అని పిలువగ కచభారము కదులుతుంది

"నంది వాహన" అనగ ఎద్దు సద్దు చేయకంది

"జంగమ దేవర " అంటే లింగము పలుకలేనంది

"నాగేశ్వర" అనగానే పాము ఆగమంటుంది

"అర్థ నారీశ్వర" అనగానే అమ్మ మిన్నకున్నది

"పశుపతి" అని పిలువగానే పాశమేమిటంటుంది

"ఏక నామధారివి" కావని ఎకసక్కెము చేస్తున్నవి

"శివోహం" అను జపమాపి నేను నిన్ను పిలువగా

"ఒక్క పేరు" చెప్పవేరా ఓ తిక్క శంకరా.

ఓం నమ: శివాయ-77

ఓం నమ: శివాయ -77

భక్త పరాధీనతతో బడలిపోయి ఉన్నావని
నక్తపు నియమాలతో నకనకలాడుతున్నావని

భక్ష్యభోజ్య చోహ్యములు,లక్షణమగు లేహ్యములు
చవులూరు చెరకు రసము,ఆహా అను అతిరసములు

నారికేళ జలాలు,నానా తినుబండారాలు
మధురస మామిడిపళ్ళూ,మంచి నేరేడు పళ్ళు

చక్కెరకేళి పళ్ళు,చక్కనైన ద్రాక్షపళ్ళు
ఆరు రుచుల ఆథరువులు ఆత్మీయ సమర్పణలు

పోషణలేక నీవు సోషతో సొక్కిపోతావని
మక్కువతో తినిపించగ గ్రక్కున నేను వస్తే

విషము రుచి నీకంత విపరీతముగా నచ్చిందా
ఒక్కటైన ముట్టవేర ఓ తిక్క శంకరా

ఓం నమ: శివాయ-78

ఓం నమ: శివాయ -78

బావిలోన నీవున్నావని భక్తుడిగా నేవస్తే
బావిలోని కప్ప నిన్ను తనతో పోల్చుకుంది

కొండమీద నీవున్నావని కొలువగ నేవస్తే
బండరాయి కూడ నిన్ను తనతో పోల్చుకుంది

బీడునేల నీవున్నావని తోడు కొరకు నేవస్తే
జోడువీడు అంటు బీడు తనతో పోల్చుకుంది

అటవిలోన ఉన్నావని అటుగా నేవస్తే
జటలు చూడు అంటు అడవి తనతో పోల్చుకుంది

చెట్టులోన ఉన్నావని పట్టుకొనగ నేవస్తే
పట్టులేక ఉన్నావని చెట్టు తనతో పోల్చుకుంది

సఖుడివి నీవై సకలము పాలిస్తుంటే
ఒక్కరైన పొగడరరేర ఓ తిక్క శంకరా.

ఓం నమ: శివాయ-79

ఓం నమ: శివాయ  -79

నీ నెత్తిమీది గంగను చూసి నదులు బెంగపడ్దాయట
మా నెత్తిమీదికి ఏ ఆపద ముంచుకొస్తుందో అని

నీ కంఠమంటిన పామును చూసి కొండచిలువలు బెంగపడ్దాయట
మా కంటిముందు ఏ దండన వెన్నంటి ఉందో అని

నీ చేతిలోని మృగమును చూసి వాటికి సంతోషము మృగ్యమై పోయెనట
వాడి బాణమేదో తమను దాడిచేయనుందని

నీ గజ చర్మమును చూసి గజములు గజగజలాడుతున్నాయట
పొట్టచీల్చి ఎవరు తమను పొట్టను పెట్టుకుంటారో అని

నీ బ్రహ్మ పుర్రెలు చూసి జనము విలవిలలాడుతున్నారట
రిమ్మతెగులు తగులుకొని దుమ్ము నోట కొడుతుందేమో అని

"దయనీయశ్చ దయాళుకాస్తి" అని సువర్ణమాల అనగానే
నే ముక్కున వేలేసానురా ఓ తిక్క శంకరా.

ఓం నమ: శివాయ-80

ఓం నమ: శివాయ 80
****************

ఆంతర్యము ఏమోగాని వెలుగసలే తెలియని
అమావాస్య చీకటికి ఆనంద పడతావు

విడ్డూరము ఏమోగాని వివరమసలే తెలియని
గంగ అభిషేకములకు పొంగిపోతు ఉంటావు

పూర్వ పుణ్యమేమోగాని పువ్వులసలే తెలియని
మారేడు దళాలకు మహదానంద పడతావు

ఇంద్రజాలమేమో గాని అందమే తెలియని
బూదిపూతలకు నీవు మోదమెంతో పొందుతావు

నీ దయ ఏమోగాని నియమ పాలనే తెలియని
నికృష్టపు భక్తులను నీ దరిచేర్చుకుంటావు

కనికట్టు ఏమోగాని అసలు నీ జట్టే తెలియని
ఒక్కడిని ఉన్నానురా ఓ తిక్క శంకరా.

ఓం నమ: శివాయ-81

  ఓం నమ: శివాయ -81

కళల మార్పుచేర్పులతో కదులుచున్న చంద్రుడు
నీ సిగముడుల చీకట్లో చింతిస్తూ ఉంటాడట

కుబుసపు మార్పుచేర్పులతో కదలాడు పాములు
నీలలోహిత చీకట్లో చింతిస్తూ ఉంటాయట

కునుకురాక తెరువలేక కుదురులేని మూడోకన్ను
తెర తీయని చీకట్లో చింతిస్తూ ఉంటుందట

ఆకాశము నుండి సాగి జార అవకాశము లేని గంగ
బందిఖానా చీకట్లో చింతిస్తూ ఉంటుందట

చీకటిని తొలగించలేని జ్యోతి శివుడేనట
చింతలు తొలగించలేని వింతశక్తి శివుడట

దోషము తొలగించలేని వానికి ప్రదోష పూజలా అంటూ
ఒక్కటే గుసగుసలు ఓ తిక్క   శంకరా.

SIVA SANKALMU-82

ఓం నమ: శివాయ -82

ఆనంద భాష్పాలతో అభిషేకము చేయనా
భక్తి మకరందమును గంధముగా పూయనా

ఆది, అనాది నీవంటూ బూదిని నే పూయనా
శాంతి,సహన పుష్పాలతో పూజలు నేచేయనా

పాప రహితము అనే దీపమును వెలిగించనా

పొగడ్తల పూల వాసనలు అను పొగలను నే వేయనా

లబ్బు-డబ్బు శబ్దాలతో స్తోత్రములను చేయనా
ఉచ్చ్వాస-నిశ్వాస వింజామరలనే వీచనా

అరిషడ్వర్గములు లేని ఆతిధ్యమునీయనా
హరహర మహదేవ అంటు హారతులనే ఈయనా

దాసోహం దాసోహం అంటు ధన్యతనే పొందనా
నా పక్కనే ఉన్నావురా చూడ చక్కనైన శంకరా.

ఓం నమ: శివాయ-83

ఓం నమ: శివాయ -83

సూక్ష్మము నేనంటావు స్థూలముగా ఉంటావు
వీరుడినని అంటావు పారిపోతు ఉంటావు

ఆది నేను అంటావు అనాదిగా ఉంటావు
సన్యాసిని అంటావు సంసారిగ ఉంటావు

పంట భూమినంటావు బీడునేలవవుతావు
జలాశయమునంటావు ఒయాసిస్సువవుతావు

రాజుని నేనంటావు బంటుగా మారుతావు
ప్రణవము నేనంటావు ప్రళయముగా మారుతావు

స్థాణువు నేనంటావు తాండవమాడుతుంటావు
అనుక్షణము సాగుతావు ఆరునెలలు దాగుతావు

దాగుడుమూతలు చాలుర కుదురు లేకుంటేను
వెక్కిరింతలేనురా ఓ తిక్క శంకరా.

ఓం నమ: శివాయ-84

ఓం నమ: శివాయ -84

దారుణ మారణ కాండను కారుణ్యము అంటావు
పొట్ట చీల్చి గజాసురుని మట్టి కరిపించావు
చుట్టుకుంది అతని తల నీ సుతు శరీరమునే

కన్ను తెరిచి మన్మథుని కన్ను మూయించావు
కన్నుల పండుగ ఐనది నీ కళ్యాణముతో

బాణమేసి వరాహము ప్రాణమే తీసావు
పాశుపతము చేరినది అర్జునునికి ఆశీర్వచనమై

హరిని అస్త్రముగా వాడి త్రిపుర సమ్హారము చేసావు
విరచితమైనది వీరముగా హరి మహిమ

ఎటు చూసిన పాతకమే నీ గతముగా మారితే
నీకు "మహాదేవం,మహాత్మానాం,మహా పాతక నాశనం" అని స్తుతులా అంటే
చక్క బరచుట అంటావురా ఓ తిక్క శంకరా.

SIVA SANKALPAMU-85

తిరిపమెత్తువాడవని నిరుపేద శ్రీనాథుడు
గలగల ప్రవహించనీయవని,గడుసువాడవని గంగ

చర చర పాకనీయవని చతురుడవని కాళము
పరుగులు తీయనీయవని పాశమున్నదని లేడి

కిందకు జారనీయవని నిందిస్తున్నది విషము
కదలనేనీయవని వంతపాడు జాబిలి

కట్టడి చేస్తున్నావని కట్టుకున్న కపాలములు
హద్దు దాటనీయవని వద్దనున్న వృషభము

ఆ లయకారుడు అసలు "ఆలయమున" ఉంటాడా?
మేమెంతో గొప్పవారమంటూ వంతులవారీగా

నీ చెంతనే ఉంటూ కాని చింతలు చేస్తుంటే వాని
పక్క దారి మార్చవేరా ఓ తిక్క శంకరా.

SIVA SANKALPAMU-86

ఓం నమ: శివాయ-86

పాలకడలి జనించిన " గరళము" నిను చేరితే
మురిపాల పడతి హరిని "శ్రీహరిని" చేసింది

"శరభరూపమున" నీవు శ్రీహరిని శాంతింప చేస్తే
విభవమంత హరిదేగా " ప్రహ్లాదచరిత్రలో"

" చిలుకు ఏకాదశి " నాడు చకచక లేచేసి
" దామోదరుడు" నిన్ను చేరినది మోదము కొరకేగా

" అభిషేక జలాలతో" నీవు ఆనందపడుతుంటే
" అలంకారాలన్నీ" హరి తన ఆకారాలంటాడు

అనుక్షణము నీవు "అసురులను చెండాడుతుంటే"
లక్షణముగా "హరి తులసిని పెండ్లాడాడు"

" అలసటయే నాదని"" ఆనందము హరిది" అని
"ఒక్క మాట" చెప్పవేర ఓ తిక్క శంకరా.

ఓం నమ: శివాయ-87

ఓం నమ: శివాయ-87

"పెద్ద దేవుడనని" అని నీవంటే" మద్ది" తెల్లబోయింది
"అంబే శివుడిని" అని నీవంటే "జంబూ" బెంబేలెత్తింది

"భూత నాథుడిని" అని నీవంటే "చూతము" చూతమంది
"దొడ్డవాడిని" అని నీవంటే " గడ్డి" అడ్డుచెప్పకుంది

"చెలకని వాడను" అని నీవంటే "చెరకు" ఊరుకున్నది
"మీ రేడును" అని నీవంటే "మారేడు" మారాడకున్నది

"ఉబ్బు లింగడిని" అని నీవంటే "కొబ్బరి"నిబ్బరించుకుంది
"నిర్వాహకుడిని" అని నీవంటే "ఉర్వారుకము"నవ్వింది

"యోగిని" అని నీవంటే నీవంటే "రేగి" ఆగి పోయింది
" వృక్షేభ్యో- హరికేశేభ్యో" అని మొహమాటముతో అనగానే

"అన్ని చెట్లు" నీవంటే "అక్కసుతో" పచ్చి అని,నిన్ను
వెక్కిరించాయిరా ఓ తిక్క శంకరా. 

ఓం నమ: శివాయ-88

ఓం నమ: శివాయ-88

కంటినీటి పూసలు నీకు కలిమిని అందీయగలవా
సిగ పూవగు గంగమ్మ నీకు సిరులను అందీయగలదా

కట్టుకున్న గజ చర్మము నీకు పట్టు పుట్టమీయ గలదా
నమ్ముకున్న ఎద్దు నీకు సొమ్ములను ఈయగలదా

కరమున ఉన్న శూలము నీకు వరములు అందీయ గలదా
పట్టుకున్న పాములు నీకు పసిడిని అందీయ గలవా

కదలలేని చంద్రుడు నీకు ఇంద్రపదవిని ఈయగలడా
కాల్చుచున్న కన్ను నీకు కాసులనందించ గలదా

కరుగుచున్న నగము నీకు మెరుగు తరగని సంపదీయ గలదా
ఆది శక్తి పక్కనున్న ఆది భిక్షువైన నిన్ను

" ఓం దారిద్య్ర దుఖ: దహనాయ- నమ: శివాయ" అని పొగడుతుంటే
ఒక్కరైన నమ్మరురా ఓ తిక్క శంకరా.

ఓం నమ: శివాయ-89

ఓం నమ: శివాయ
***************

సుగంధిపుష్టి కర్తకు సుప్రభాత దీపములు
నిటలాగ్ని హోత్రునికి నిత్య ధూప దీపములు

పాషాణపు దేవునికి ప్రభల వెలుగు దీపములు
కందర్ప దర్పునికి కర్పూర దీపములు

పరంజ్యోతి రూపునికి ప్రమిదలలో దీపములు
జలజాక్షునికి వేడుకగా జలములోన దీపములు

ప్రమథ గణాధిపతికి ప్రదోషవేళ దీపములు
ఆశాపాశ రహితునికి ఆకాశదీపములు

మా ఆర్తిని తొలగించే కార్తీక దీపములు
దీపములను పేర వెలుగు నీ నామ రూపములు

జాణతనము తోడుకాక జ్వాలాతోరణములో
చిక్కు కున్నావురా ఓ తిక్క శంకరా

ఓం నమ: శివాయ-90

"అసంగోహం అసంగోహం-అసంగోహం పున: పున:"ఓం నమ: శివాయ

శివుని తల్లి "బెజ్జ మహాదేవి" అంటున్నారు
"శిలాదుడు" తండ్రి అని నేను వింటున్నాను

శివుని అక్క "మగాదేవి" గారాబం చేస్తుందట
శివుని పత్ని "పార్వతి" పరిపాలించేస్తోందట

గణపతి-గుహుడు శివుని సుతులంటున్నారు
శివుని సఖుడు "హరి" అట చెప్పుకుంటున్నారు

శివ భక్తి "తమదని" పక్షులు చెప్పుకుంటున్నాయి
శివ లీలలు "యుగయుగములు" కనువిందు చేస్తున్నవి

భావనలో నిండినది "బహు చక్కని కుటుంబము"
"బ్రహ్మజ్ఞాన వలీనము" బహు చక్కగ చెబుతున్నది

"అసంగోహం-అసంగోహం
అసంగోహం-పున:పున:"
చక్కనైన మాటలేరా ఓ తిక్కశంకరా.

ఓం నమ: శివాయ-91

" నాస్తి శర్వ సమో దేవ
నాస్తి సర్వ సమో గతి
నాస్తి శర్వ సమో దానే
నాస్తి సర్వ సమో రణే"-యుద్ధంలో శర్వునితో సమానుడు లేడు.

ఓం నమ: శివాయ

నారి ఊడదీయమనగానే " జారిపోవ చేసావు"
అమ్ములు దాచేయమనిన" గమ్మున దాచేసావు"

విల్లు కనపడకూడదనిన "వల్లె" అని అన్నావు
పినాకమే కానరాని "పినాకపాణివి" నీవు

మంచపు కోడును కూడా" కనిపించకుండ చేసావు"

ఖట్వాంగమే కానరాని" ఖండోబా దేవుడవు"

పరశును మొద్దుచేయమనిన" పదునును తీసేసావు"
" ఖండ పరశు కానరాని" పరమేశ్వరుడవు నీవు

లేశమైన లేకుండా" ఆశాపాశము తీసేశావు"
" పాశుపతాస్త్రము లేని" పశుపతివి నీవు

రుద్రములో చెప్పారని వద్దనక,అన్ని, చేస్తుంటే, నిన్ను
తెలివితక్కువ అంటారురా ఓ తిక్క శంకరా.

ఓం నమ: శివాయ-92

" గళే ౠండమలం "తనౌ సర్పజాలం"
మహాకాలకాలం గణేశాధిపాలం
ఝటాజూటభంగోత్తరంగైర్విశాలం
శివం శంకరం శంభుమీశానమీడే. "

ఓం నమ: శివాయ

" విషమును దాచిన వాని వివరము" నీకెందుకంటు
అతని భక్తులము మేము "అనుక్షణము వదలమంటు"

నీ" పాద మంజీరమైన పాము" వదలని" ఆపదగా మారింది"
నీ" నడుముకు చుట్టుకున్న పాము" "నరకము తానేనంది"

నీ" జందెమైన పాము" నన్ను" బంధించిస్తోంది"
నీ" కరకంకణమైన పాము" నాపై "కనికరమే లేదంది"

నీ "మోచేతిని తాకుపాము" "వెతలకతగ మారింది"
నీ "మెడను తిరుగు పామేమో" "సంసారము తానంది"

"నీ జడను ఆడుచున్న పాము" నన్ను" జడముగా మార్చింది"
పోనీ అని "నువ్వు వాటిని రానిస్తే","కాని పనులు చేస్తూ"

కాలకూటము చిమ్మి "నన్ను" కాటువేయ చూస్తుంటే
" ఒక్క మాటైన అనవురా" ఓ తిక్క శంకరా.

ఓం నమ: శివాయ-93

" ప్రఫుల్లనీలపంకజప్రపంచకాలిమప్రభా-
-విలంబికంఠకందలీరుచిప్రబద్ధకంధరమ్ |
స్మరచ్ఛిదం పురచ్ఛిదం భవచ్ఛిదం మఖచ్ఛిదం
గజచ్ఛిదాంధకచ్ఛిదం తమంతకచ్ఛిదం భజే ||"

ఓం నమ: శివాయ
*****************
ఆపివేయ పలికినదియేగా "శివతాండవ స్తోత్రము"
శాపమీయ పలికినదియేగా "శివ మహిమ స్తోత్రము"

కనకాభిషేకమునకై కదిలినదేగా" కాశీఖండము"
వీర శైవ ఉన్మాదమేగ" బసవ పురాణము"

శాశ్వత స్థావరమునకేగా "శంకరాచార్య విరచితములు"
మేక మేథ బోధలేగ "నమక చమక స్తోత్రములు"

దిగ్గజ అక్కజమేగా" శ్రీ కాళ హస్తీశ్వర మహాత్మ్యము"

అడిగి ఆలకిస్తావు ఆనంద భాష్పాలతో
అతిశయముగ చూస్తావు హర్షాతిరేకముతో

"నిష్కళంక మనసు" నిన్ను కొలిచినది" శూన్యము"
యుక్తితో ముక్తి కోరువారిని "నీ భక్తులు" అను మాయలో
చిక్కు కున్నావురా! ఓ తిక్క శంకరా.

ఓం నమ: శివాయ-94

"అజ్ఞానాద్దేవ దేవేశ యదస్మాభి రణుస్థితం
కర్మణా,మనసా,వాచా తత్సర్వం క్షంతుమర్హసి.

నమో భవాయ భవ్యాయ భావనాయోద్భవాయచ
అనంత బల వీర్యాయ భూతానాం పతయే నమ:"

ఓం నమ: శివాయ
***************

తిరుగుచున్న భూమి అనే తీరులేని "రథముతో"
నారి కట్టలేని మేరుకొండ అనే" వింటితో"

చేతి నుండి జారిపోవు కోతి అనే" అస్త్రముతో"
ఎదుటిసేన కాంచలేని" ఎగుడు దిగుడు కన్నులతో"

బారెడైన కప్పలేని కరిచర్మపు " కవచముతో"
పుర్రెతప్ప మోయలేని "కుర్రదైన చేతితో"

వీరముపై నీళ్ళుజల్లు " నెత్తిమీద కుండతో"
శత్రువుల మూలమెరుగలేని "శూలముతో"

పురములు దగ్గరైన" రిపుజయ శాపమున్న వారితో"
నేనెవరో తెలుసా అంటూ నీవు" డంభముతో"

లోహ త్రిపురులను జయించి " ఆహా అనుకుంటుంటే" నేను
"బిక్కమొగము" వేసానురా! ఓ తిక్క శంకరా.

ఓం నమ: శివాయ-95

" ఓం నమ: శివా య "-95
****

" నీ పిరికితనమును" చూసి" నీ నామము" భయపడినది
ఎందుకైన మంచిదని పొంచిపొంచి" దాగినది"

రెండు వేదముల మధ్య "యజుర్వేదమును" పెట్టింది
అష్టము వాకము "రక్షణ అని" సుస్పష్టము చేసినది

" ఓం నమ:"-" య" అను శబ్దములను అటు-ఇటు నిలిపింది
"రెండు" అక్షరములను "దాచలేని" దైవము నీవేనంది

" పంగ నామమును " పెడతావని బెంగ పడుతున్నది
"గంగపాలు" చేస్తావని గజగజలాడుతున్నది

" నామ స్మరణము" నావగ దరి చేర్చేస్తుందట
భయపడు "నీ నామమే" భవహరణమవుతుందట

"పరిహాసాస్పడుడవగు" నిన్ను "పరమేశ్వరుడు" అని
మొక్కుతున్నారురా! ఓ తిక్క

ఓం నమ: శివాయ-96

" కంబు గ్రీవం కంబు కంఠం ధైర్యదం ధైర్య వర్ధకం
శార్దూల చర్మ వసనం మహాదేవం నమామ్యహం."

ఓం నమ: శివాయ

నీకు పూజచేస్తే పున్నెమని విన్నానురా,వినయముతో
కాళ్ళుచేయి కడుగ నీళ్ళకెలితే గంగ కస్సుమన్నదిరా
"స్నానమెట్లు చేయిస్తు" సముదాయించర గంగను

"నిన్ను కూర్చోమనగానే" వేటకై తుర్రుమన్నదిరా పులి

"జందెమైన ఇద్దమన్న" చరచర పాకింది పాము

"కట్టుకోను బట్టలన్న" కనుమరుగయింది కరి

"నైవేద్యము చేయబోవ" విషజంతువులన్ని మాయము

వెతుకులాడి వెతుకులాడి" వేసారితిరా శివా"
అక్కజమేముందిలే నీ అక్కర తీరిందేమో
ఒక్కటైన కలిసిరాదు "చక్కనైన పూజసేయ"

మాయ తొలగిపోయె నేడె "మానస పూజ చేయగ"
దిక్కులే ధరించిన! ఓ తిక్క శంకరా.

ఓం నమ: శివాయ-97

" నమః కులాలేభ్యః కర్మారేభ్యశ్చవోనమః".
" కుంభకారులకు నమస్కారము. లోహకారులగు మీకు నమస్కారము."

ఓం నమ: శివాయ

"కుమ్మరివి నీవంటే" ఓటికుండ నవ్వుకుంది
"కమ్మరివి నీవంటే "లోహము నమ్మకమే లేనంది

"వడ్రంగివి నీవంటే" కొయ్యముక్క అయ్యో అంది
"విల్లమ్ములు నీవంటే" రెల్లుపూజ చెల్లు అంది

"పైరు పచ్చ నీవంటే" పంట-పంటలేసుకుంది
"వైద్యుడివి నీవంటే" ఔషధము నైవేద్యాలే అంది

"గురువువి నీవంటే" స్వరము విస్తుపోయింది
"చల్లని ఇల్లు నీవంటే "ఇల్లరికము ఇదే అంది

"నమో విరూపేభ్యో విశ్వ రూపేభ్యో" అని అనగానే
"అన్ని రూపములు నీవేనని" ఆరోపించుకుంటుంటే ,నీతో
చిక్కేనురా ఎప్పుడు ! ఓ తిక్క శంకరా

ఓం నమ: శివాయ-98

" సంపూర్ణ కామదం సౌఖ్యం భక్తేష్ట ఫలకారణం
సౌభాగ్యదం హితకరంచ మహాదేవం నమామ్యహం "

ఓం నమ: శివాయ

ఉదారతను చాటగ " అసురుని ఉదరములో నుంటివి"
" గంగిరెద్దు మేళము" నిన్ను కాపాడినది ఆనాడు.

వరముగ కోరాడని " అసురుని హస్తమున అగ్గినిస్తివి"
" మోహిని అవతారము" నిన్ను కాపాడినది ఆనాడు.

భోళాతనమును చాటగ " అసురునికి ఆలినిస్తివి"
" నారద వాక్యము" నిన్ను కాపాడినది ఆనాడు.

ఆత్మీయత అను పేర " ఆ అసురునికే ఆత్మలింగమునిస్తివి"
" గణపతి చతురత" నిన్ను కాపాడినది ఆనాడు

భ్రష్టులైనవారిని "నీ భక్తులు" అని అంటావు
రుసరుసలాడగలేవు "కసురుకొనవు అసురతను"

మ్రొక్కరని అసురులకు " గ్రక్కున వరములు ఇస్తే"
" పిక్క బలము చూపాలిరా" ఓ తిక్క శంకరా.

భావము

ఓం నమ: శివాయ-99

" ఏ వేదంబు పఠించె లూత? భుజగం బే శాస్త్రముల్సూచెఁ దా
నే విద్యాభ్యసనం బొనర్చెఁగరి; చెం చే మంత్ర మూహించె? బో
ధా విర్భావ నిదానముల్ చదువులయ్యా? కావు; నీ పాదసం
సేవాసక్తియె కాక జంతు తతికిన్ శ్రీ కాళహస్తీశ్వరా! "

ఓం నమ: శివాయ

" అనిశము వశమగుతావు" పశునామములకు నీవు
"పశుపతి" అని పిలువగానే పరవశమేగా నీకు

"కాల భైరవుని" కాశికాపురపతిని చేసావు
"శరభమువై" నరసిమ్హుని శాంతింప చేసావు

మిక్కుటమగు ప్రేమగల "కుక్కుటేశ్వరుడివి" నీవు
వ్యాళము మీద మోజుగల "కాళేశ్వరుడివి" నీవు

"స్కంధోత్పత్తికి" వనమున లేడిగ క్రీడించావు
వ్యాఘ్రమునకు మోక్షమిచ్చి "వ్యాఘ్రేశ్వరుడివి" అయ్యావు

జంబుకమును అనుగ్రహించిన " జంబుకేశ్వరుడివి"

శ్రీ,హస్తి,కాళములను దయ తలచిన "శ్రీ కాళ హస్తీశ్వరుడవు"

" పాశమేసి" నన్ను బ్రోవ రమ్మంటే,నా భక్తిని
"కప్పల తక్కెడ" అంటావురా ఓ తిక్క శంకరా.

ఓం నమ: శివాయ-100

" న కార్తికసమో మాసో న కృతేన సమం యుగమ్,
న వేదసదృశం శాస్త్రం న తీర్థం గంగయా సమమ్."

" అర్ధం: కార్తీకమాసానికి సమానమైన మాసమేదీ లేదు; సత్యయుగంతో సమానమైన యుగమేదీ లేదు; వేదములతో సమానమైన శాస్త్రమేదీ లేదు; గంగానది వంటి ఇతర నదేదీ లేదు."

ఓం నమ: శివాయ

" అభిషేకములను చేస్తే" శుభములను ఇస్తాడట
" బూది పూతలను పూస్తే" మోదములే ఇస్తాడట

"దీపము దానము చేస్తే" పాపము పోగొడతాడంట
"రాయిని దానము చేస్తే" సాయము అవుతాడట

'శివ నామము" జపియిస్తే పరవశుడే అవుతాడట
తమ వాడని తలిస్తే "మమేకమే అవుతాడట"

"పురాణ పఠనము చేస్తే" పునర్జన్మ తొలగునట
బ్రహ్మ రాక్షసుడు వినగానే" బ్రహ్మజ్ఞాని అగునట"

"కృత్తికా నక్షత్రము" కృతకృత్యులను చేస్తుందట
"కార్తిక దామోదరుడంటు" హరి శివుని చేరునట

"పదకొండు నెలలు వదిలినా" కైవల్యమును పొందగా
"ఒక్క కార్తికము చాలునట"! ఓ తిక్క శంకరా.

ఓం నమ: శివాయ-101

   శివ సంకల్పము-101

 తామరలున్న కొలనులో తిరుగాడు కప్పను నేననుకో

 తామసమడచి ఆ కప్పను తుమ్మెదగా మార్చరాదో

 మధురసమున్న పాత్రలో తిరుగాడు తెడ్డుననుకో

 మేధను అనుగ్రహించి తెడ్డును జిహ్వగ మార్చరాదో

 కొమ్మకు చుట్టుకుని తిరిగాడు గాలిపటము నేననుకో

 ఇమ్ముగ జాలిచూపి దానిని చుక్కల పక్కకు చేర్చరాదో

 వాన నీరు వృధాచేయు సంద్రమునునేననుకో

 పన్నీరై క్తుథతీర్చు పంటబీడు చేయరాదో

 శివుడెంత అని అన్న గర్వపు గంగను నేననుకో

 శివపాదమే తనకు సర్వమన్న గంగగా చేయరాదో

 ఇన్ని మార్పు చేర్పులకు కూర్పువైన నిన్ను

 ఎన్న తరము కదురా నా కన్నతండ్రి శంకరా.

ఓం నమ: శివాయ-102

   శివ సంకల్పము-102

 కాసులేని వాడివని ఏవేవో రాసేస్తున్నాను

 బేసికన్నులను చూసి నే రోసిపోయి ఉన్నాను

 దోసములే నీ పనులని నే ఊసులెన్నో చెప్పాను

 వేసమేమిటో అంటూ నేను ఈసడించుకున్నాను

 కైలాసమును ఎత్తిన వాడు నీ విల్లు ఎత్తలేక పోయాడు

 సహకారము ఈయనిది అతని అహంకారమేగ శివా

 అహంకారమును వదిలేస్తే అధీనుడిని అంటావు

 ధీటులేని నీ భక్తితో రాటు చేస్తుంటావు

 స్వల్ప కాలిక లయముతో(నిద్ర) శక్తిని ఇస్తుంటావు

 దీర్ఘ కాలిక లయముతో ముక్తిని ఇస్తుంటావు

 నిన్ను తక్కువన్న నా తెలివి పక్కదారి మళ్ళించి

 మొక్కనీయరా భక్తితో ముక్కంటి శంకరా.

ఓం నమ: శివాయ-103

   శివ సంకల్పము-103

 చిలుకగ నే జన్మిస్తే చిదంబరుడ అంటాను

 కోడిగ నే జన్మిస్తే కోటిలింగేశ్వర అంటాను

 కాకిగ నే జన్మిస్తే కాళహస్తేశ్వర అంటాన్

 ఆవుగ నే జన్మిస్తే అంబాపతి అంటాను

 మేకగ నే జన్మిస్తే నే మేలమాడుతుంటాను

 పాముగ నే జన్మిస్తే భృస్మేశ్వర అంటాను

 ఏనుగుగ నే జన్మిస్తే ఏకాంబరేశ్వర అంటాను

 కీటకముగ నే జన్మిస్తే నే కీర్తిస్తూనే ఉంటాను

 జన్మకాదు ముఖ్యమనే కర్మసిద్ధాంతపు సాక్షిగా

 ఏ జన్మలో నేనున్నా ఏలినవారి దయతో

 "త్వమేవాహం" అని తలుస్తు నన్ను తరియింప చేయగా

 బిరమున నన్ను బ్రోవరా పరమైన శంకరా.

ఓం నమ: శివాయ-104

  శివ సంకల్పము-104

 భూత నాథుడు తిరుగు భూమికి దండాలు శివా

 విశ్వనాథుడుండు వాయువుకి దండాలు శివా

 అగ్ని నేత్రధారి యజ్ఞ అగ్నికి దండాలు శివా

 జటాధారి బంధించిన జలమునౌ దండాలు శివా

 ఆకస గంగను దించిన ఆకసమునకు దండాలు శివా

 క్రౌర్యము నిర్వీర్యము కావించిన సూర్యునికి దండాలు శివా

 చల్లని దయ కిరణాల జాబిలికి దండాలు శివా

 అర్థ నారీశ్వరమైన పరమార్థమునకు దండాలు శివా

 శంక రహిత శాశ్వత శంకరార్చిత దండాలు శివా

 చేద గలవు పాపములు ఈ ఐదు అక్షరములు శివా

 ఖేదమేది నేనుండగ నీ పాదముల శంకరా.

ఓం నమ: శివాయ-105

శివ సంకల్పము-105

 నువ్వు తిక్కలోడివని అంది నా మూఢత్వం

 నిన్ను చక్కదిద్దాలనుకుంది నా మూర్ఖత్వం

 నీకేమి తెలియదంది నా అహంకారం

 నీకు తెలియచేయాలనుకుంది నా అంధకారం

 నిన్ను గౌరవించలేనంది నా తాత్సారం

 నీతో గారడి చేయాలనుకుంది నా మాత్సర్యం

 నీకు నాగరికత లేదంది నాలోని ఆటవికం

 నిన్ను నాగరికుడిని చేయాలంది నాలోని ఆధునికం

 నీకు పాఠము చెబుదామనుకుంది నాలోని ఆర్భాటం

 నీకు పరీక్ష పెట్టాలనుకుంది నాలోని ఆరాటం

 సముద్రాన్ని పరీక్షించు ఉప్పుబొమ్మ నేనైతే

 నా తప్పు చెప్పినావురా ఓ గొప్ప శంకరా.

ఓం నమ: శివాయ-106

  శివ సంకల్పము-106

 తిక్కవాడివై నీవుంటే భక్యుల మొక్కులెలా పెరుగుతాయి

 మండే చెట్టూవై నీవుంటే పక్షులెలా వాలుతాయి

 కరిగే కొండవై నీవుంటే మృగములెలా తిరుగుతాయి

 పారని గంగవై నీవుంటే జలచరముఎలా బతుకుతాయి

 స్వార్థపరుడివై నీవుంటే అర్థనారీశ్వరమెలా అవుతుంది

 శితికంఠుడివై నీవుంటే స్థితికార్యమెలా జరుగుతుంది 

 లయకారుడివై నీవుంటే సృతిలయలెలా నిన్ను చేరతాయి

 మన్నించమని నేనంటే నిన్నెంచను అని అంటావు

 ఆదరమేమో నీది అవగతమయ్యెను అంతలోన

 ఆ నిందా వాక్యములు అవి గతమయ్యెను వింతలోన

 అంతలేసి మాటలాడ ముద్దుమాటలంటావురా

 అద్దమంటి మనసున్న ఓ పెద్ద శంకరా.