SAUNDARYALAHARI-35

పరమ పావనమైన నీ పాదరజ కణము

 పతిత పాలకమైన పరమాత్మ స్వరూపము

 మంచి పనులు చేయించుచున్న ఇంద్రియములు ఐదు

 వానికి సంకేతములు ఇచ్చుచున్న ఇంద్రియములు ఐదు

 సప్త ధాతువులు మనసు ఎనిమిది కలిసిన

 అష్టాదశ పీఠముల నా హృదయ మందిరము

 నిశ్చల భక్తిని నినుగొలువ నిష్ఠను చేరినదమ్మా

 మనో వాక్కాయ కర్మలను ముగ్గురు మిత్రులతో

 ఏమని వర్ణించను ఏ నోము ఫలితమో ఇది

 నా శరీరము పావన శక్తి పీఠముగా మారుచున్న వేళ

 నీ మ్రోలనే నున్న నా కేలు విడనాడకమ్మా,నా

 మానస విహారి ఓ సౌందర్య లహరి.

     భావము

 నా మనసనే తోటలో విహరించే తల్లీ.చెవి,ముక్కు,కన్ను,నాలుక,చర్మము అను జ్ఞానేంద్రియములు,పాణి,పాద,పాయు,ఉపస్థ,వాక్కు అను ఐదు కర్మేంద్రియములు,రస,రక్త,మాంస,మేధ,అస్థి,నుజ్జు,శుక్ర అను ఏడు ధాతువులు,మనసు మొత్తము పద్దెనిమిది ఉన్న నా హృదయము మనస్సు,మాట,పని అను ముగ్గురు మిత్రులతో నిష్ఠగా నిన్ను సేవించుటకు బయలుదేరినవి.ఎంతటి అదృష్టము.ఈ శుభకర సమయములో నీ చెంతనేనున్న నా వేలిని విడిచిపెట్టకమ్మా.అనేక వందనములు.

SAUNDARYA LAHARI-34

సౌందర్య లహరి-9

పరమ పావనమైన నీ పాదరజ కణము
పతిత పాలకమైన పరమాత్మ స్వరూపము

ధ్యానము,ధ్యాత,ధ్యేయము మూడు నీవేనని
బాల్య,కౌమార,యవ్వన,వార్థక్యములు నాలుగు నీవేనని
నీరు,నిప్పు,నింగి,నేల,గాలి ఐదు నీవేనని
కామ క్రోధాది గుణదోషములు ఆరు నీవేనని
సంగీత స్వరములు ఏడు నీవేనని
సప్త ధాతువులు మనసు ఎనిమిది నీవేనని
నవావరణములోని నవనవోన్మేషము నీవేనని

నన్ను ఆవరించుకొనిన మాయ తాను మాయమగుచుండగా
నీ మ్రోలనే నున్న నా కేలు విడనాడకమ్మా,నా
మానస విహారి ఓ సౌందర్య లహరి.

భావము

నా మనసనే తోటలో విహరించుచున్న తల్లీ.ఏది ధ్యానమో,ఎవరు ధ్యానించుచున్నారో,ఎవరిని ధ్యానించుచున్నారో మూడును పరమాత్మ స్వరూపములే.జీవితపు నాలుగు దశలు,పంచ భూతములు,అరిషడ్వర్గములు,సప్త ధాతువులు(రస,రక్త,మాంస,మేథ,అస్తి,నుజ్జు అను ఏడు ధాతువులు,మనసు భగవంతుని స్వరూపములే.నవావరణము లోపల ప్రకాశించు పవిత్ర మూర్తివి నీవని నన్ను కమ్ముకొనిన మాయ తొలగిపోవు చుండుటచే గ్రహించి,నీ దయచే ,నీ చెంతనే నున్న నా చేతిని విడిచిపెట్టకమ్మా.అనేక నమస్కారములు.