SAUNDARYA LAHARI-27

దాస్యము

  పరమపావనమైన  నీ పాదరజకణము

  పతిత పాలకమైన పరమాత్మ స్వరూపము

  ఉద్ధరిస్తుందంట ఉలిదెబ్బలు తిన్నబొమ్మ

  పుడమిని పాలిస్తుందంట పూజలందుకుంటున్నదమ్మ

  అడుగుతడబడనీయదట ఆరడుగులు లేనిబొమ్మ

  కరుణను కురిపిస్తుందట కనురెప్పలు వేయదమ్మ

  చేయందిస్తుందట  చలనమేలేని బొమ్మ

  రాతను మారుస్తుందట  రమ్మని ఈ రాతిబొమ్మ

  అమ్మలను గన్నయమ్మ  ఆ మల గన్న అమ్మ

  నా అపహాస్యములన్నీ  దాస్యములగుచున్న వేళ

  నీ చెంతనే నున్న  నా కేలు విడనాడకమ్మా,నా

  మానసవిహారి  ఓ సౌందర్య లహరి.

 "జనని వరదాయిని త్రిలోచని
  నీ పద దాసిని కావగదే."అని తల్లిని వేడుకొనిన లీలావతి (ప్రహ్లాదుని మాత) దాసినని స్వచ్చందముగా ప్రకటించినది.

  " బంటు రీతి కొలువు ఈయవయ్య రామా" అని త్యాగరాజు కీర్తించినాడు.ఆంజనేయ స్వామితో పాటు తనని కూడ దాసునిగా స్వీకరించమని ప్రార్థన.

  బానిసత్వము దాస్యము రెండు వేరు వేరు అర్థములనిచ్చు ఒకటిగా తోచు పదములు.పుట్టు బానిస/కట్టుబానిసలు తమ అభిప్రాయముతో నిమిత్తము లేకుండా బానిసలైన వారు.కాని దాస్యము అంటే ఆ  మానవాతీతమైన  పరమాత్మను యజమానిగా తలచి,స్వచ్చంద సేవకునిగా/సేవికగా తనకు తాను నియంత్రించుకొనుట  దాస్యభక్తి.ఇందులో ఎవరి ప్రమేయము,బలవంతము ఉండదు.భగవంతుడు దాసుడివి కమ్మని అనడు.అయినను భగవద్గుణములకు పరవశించి,భగవదనుగ్రహముతో భగవతిని సేవిస్తు తరించగల చక్కని అవకాశమే దాస్యము.  

   భగవతత్త్వమును సేవించిన రామదాసు,సూరదాసు,తులసిదాసు  అంతదాక ఎందుకు మహాకవి కాళిదాసు మహానుభావులైనారు.పెద్దలు వచించిన కథల ప్రకారము పరమాత్మ తన భక్తులను ఉద్ధరించుటకై తానెన్నో కష్టములను ఆనందముగా స్వీకరించెనట.సతి సక్కుబాయి,భక్త నందనారు ఇలా ఎన్నో కథలు భగవంతునికి-భక్తినికి గల దాసానుదాస హేలలను బోధపరచుచున్న సమయమున,చెంతనే నున్న నా చేతిని విడిచిపెట్టకమ్మా.అనేక నమస్కారములు.

  మణిద్వీప వర్ననలోను వజ్రమణి ప్రాకారాములో అనేకానేక దాస భక్తులు అమ్మవారికి
తాళపత్ర వీవనలను అందించుటలోను,ఆభరణములతో సేవించుటలోను,తాంబూలాదులను అందించుటలోను,మధుర్ గానాములో మాతను సేవించుటకును ,అలంకారాదులలోను,పుష్పార్చనలోను ఆ యా ఋతువుల సమయానుసారముగా సేవలుచేస్తారని చెప్పబడినది.

SAUNDARYA LAHARI-26

  సౌందర్య లహరి-26

  పరమపావనమైన  నీపాదరజ కణము
  పతిత పాలకమైన  పరమాత్మ స్వరూపము

  మధుకైటభ సంహారివి  మాధవ సోదరి
  భండాసురుని జయించిన భువనభాండ రక్షిణివి


  రక్తబీజునికి ముక్తినందించిన శక్తిస్వరూపిణివి
  విషంగ విశుక్రుల విషమును అరికట్టితివి

  మహిషాసురుని మర్దించిన మహిమాన్వితవి
  అవనీ పాలనకై  ఎన్నో అవతారములనెత్తితివి

  అరిషడ్వర్గములనడచు  అసుర సంహారములు
  మదరహితములై తల్లికి వందనములగుచున్న వేళ

  నీ మ్రోలనే నున్న నాకేలు విడనాడకమ్మా,నా
  మానస విహారి  ఓ సౌందర్య లహరి.



 అంబ వందనం  జగదంబ వందనం
 సంబరాన కొలువుతీరె శక్తి, వందనం
 భవతారిణి భగవతికి, భక్తి వందనం

పారిజాత అర్చనల  పాదములకు వందనం
పాపనాశిని పావని  పార్వతి వందనం.

గులాబీలు గుబాళించు  గుల్భములకు వందనం
గణపూజిత గుణాతిశయ  గౌరి వందనం.

ముద్దు గణపయ్య  కూర్చున్న  ఊరువులకు వందనం
ఎద్దునెక్కు శివునిరాణి  గిరిజ వందనం.

అఘరహిత తల్లి శుభ జఘనమునకు వందనం
గిరితనయ విరిపూజిత దుర్గ వందనం.

విదుషీమణి అలంకృత  మణిమేఖలకు వందనం
అఖిలాండపోషిణి  ఆదిశక్తి అన్నపూర్ణ వందనం.

భక్తానుగ్రహ హృదయారవిందమునకు వందనం
ముక్తినిచ్చు అలంపుర జోగులాంబ వందనం.

సకలశాస్త్ర ధర శుభకర కంకణములకు వందనం
శక్తిపీఠ నిలయ లంక శాంకరి వందనం
.
త్రయంబకుని రాణి భవాని కంబుకంఠమునకు వందనం
సృష్టి స్థితి లయ రూపిణి త్రిపుర సుందరి

విబుధ స్తుతుల విరాజిల్లు చుబుకమునకు వందనం

లక్షణ రూపిణి సన్నుత కొళాపురి మహాలక్ష్మి వందనం.

బీజాక్షర పూరిత   రాజ్ఞి ఓష్ఠమునకు వందనం
అఖిల జగతి సాక్షి కాశి విశాలాక్షి వందనం.

ముక్తిప్రదాత్రి యోగశక్తి వక్త్రమునకు వందనం
శుక పలుకుల శుభకరి కశ్మీర వాణి వందనం.

నవమౌక్తిక నాట్యాల నాసాగ్రమునకు వందనం
నవనవోన్మేషి స్థితివి నారాయణి వందనం.

తపోధనుల తల్లి నీ కపోలములకు వందనం
కన్నతల్లి కల్పవల్లి శ్రీ లలితాంబిక వందనం.

సూర్య చంద్ర చిత్స్వరూప నేత్రములకు వందనం
స్తోత్రప్రియ మూర్తిత్రయ కామాక్షి వందనం.

మణికుండలముల మెరయు కర్ణములకు వందనం
శ్రుతి స్మృతి వినుత విరాజిత అపర్ణ వందనం.

ఫాలలోచనుని రాణి ఫాలమునకు వందనం
పాలాభిషేక ప్రియ నందిని పార్వతి వందనం.

అక్షయ ప్రశస్తిగ కస్తూరి కుంకుమకు వందనం
లక్ష లక్షణ ప్రస్తుత దాక్షాయిణి  వందనం.

క్లేశహరిణీ పరిమళ కేశములకు వందనం
వాసవాది వినుత కేశవ సోదరి వందనం.

అంబవందనం  జగదంబ వందనం
కంబుకంఠి రాణి కళ్యాణి వందనం.

  సకలజగతి వందనములిడుచున్న సమయమున చెంతనే నున్న నా చేతిని విడిచిపెట్టకమ్మా.అనేక నమస్కారములు.