sambho tavaaraadhanamu-by prasad nimmagadda,

  శంభో తవారాధనము-ప్రసాద్ నిమ్మగడ్డ.

1.ఆదిగురు.. ఆదియోగి.. శ్రీ చిదానందరూపా శివోహం..

జ్ఞానోపార్జన జేసి సప్త ఋషులున్ జ్ఞాతవ్య కామ్యార్థులై
ధ్యానధ్యేయ ధురంధరున్  త్రిభువనాధారాత్మకుండెవ్వడా
నానాయోగ విశారదా విభవమా నాగేంద్ర హారుండనెన్
మౌనాంతర్ముఖ ముద్ర నిద్ర మహిమే మార్గాంతరమ్ ముక్తికిన్ !!


2.గంగా జీవనదీ ప్రవాహ వరదాం  కాంతార్ధ దేహస్థితామ్  
భృంగస్వాంత విజృంభినీం రిపుహరీం భాండారి భార్యామణీమ్
సాంగోపాంగ సమస్త సృష్టి దమనాం సంవర్తకం  వర్తకామ్
శృంగశ్రేణి హిమాలయాలయకరాం  శాంతిప్రియాం శంకరమ్!

3.పూర్తింగొల్వ సుషుప్తి తృప్తి సుఖముల్ పూర్ణానురాగంబులున్

  మూర్తీ రూపముదాల్చి ముందు నిలిచెన్ ముక్తిన్ సదా జూపుచున్

  కార్తికంబునకామితార్థఫలముల్ కాత్యాయనీ నాథులున్

  ఆర్తిం దీర్చెడి ఆదిదంపతులనే యాచించి నే వేడెదన్.

4.4.ఆస్తుల్ దెచ్చు సమస్త బంధుజనముల్ ఆదంబరాలున్!గతిర్

  నాస్తిన్ నీ పదసేవతప్ప  గిరిజా నాథేశ్వరా! శంకరా

  మస్తిష్కంబును మీదుగట్టి మదిలో మంత్రంబుగా మార్చితిన్

  స్వస్తిశ్రీ శశిభూషణా త్రినయనా సర్వజ్ఞ సర్వాత్మకా.

5. ఎట్టి శ్రీశుభ మూర్తి రుద్రుడదిగో ఏకాదశ స్వామియే 
   జుట్టేమో సరిగంగ తానములహో జూటంబు బంధింపగా
   జట్టై యా దమరు త్రిశూలములవే చండ ప్రచండంబులౌ
   పెట్టిందా చిరుచంద్రవంక శిఖిపై ప్రేరేపణా శీతలా


 6.  బొట్టే,మో ప్రళయాగ్ని నేత్రరుచితో భూతాలకే సూచనై
     గట్టి శ్రేష్టి విషంబు కంఠవశమై గాంభీర్య్క్షేమప్రదా
     చుట్టూ చుట్టిన వాసుకీ చలనమే స్తోత్రించు నీ నామమే
     కట్టీందా కరిచర్మ మర్మమదిగో కారుణ్య వాత్సల్యమై

.7. పుత్రీ పర్వతరాజ నిశ్చిత యయెన్ పూజించి సేవించగన్
   నేత్రాగ్నిన్ నిశితంబు చేసి నిలిపెన్ నీరయ్యనా మారుడున్
   మైత్రీబంధము దారిచూపెను గదా మాంగల్య మంత్రంబుగన్
   చిత్రం విష్ణువు సూక్ష్మ సూత్ర కథనం సేనాధిపున్ జన్మమున్.

8.శ్రీరుద్రుండు భవాని శంకరుడటుల్ శ్రీకారమున్ జుట్టగా
  మేరున్నేలుచు మిథ్యలన్నియునవే మిన్నీరగున్ స్వామియే
  లేరన్నట్టి విశిష్ట వాదులెపుడో లీలామృతం గ్రోలుదుర్

  వేరే జన్మ నివారణంబవునుగా వేదాత్మలో లీనమై.

9.చిక్కేదారిని కోరిచేరి సలిపెన్ క్షీరాబ్ధిలో మంథననం

  దిక్కే తోచక దీనులైరి దివిజుల్ తేలింది హాలాహలం

  ముక్కంటిన్ ముదుతుణ్ణీ చేయ ముసలం ముద్రించె కంఠంబునన్

  పెక్కున్ జోతలు పర్చి కూర్చిరికదా పింగాక్షునిన్ దక్షతన్.

10.నానాసృష్టి విశిష్ట పుష్టి లయమున్  నైమిత్తికా న్యాయముల్
లీనంబై సమవర్తి చెంత మెదులున్  లీలా తిరోధానమున్
మౌనంగా  సమయానుకూల గతిలో మంత్రించి సృష్టింతువే
నీ నాట్యశ్రుతి పంచ తాండవములే  నిర్దిష్టముల్ నిత్యముల్!

తా: సృష్టి, పుష్టి, లయము నియమించబడిన (నైమిత్తిక) న్యాయములు. లయమైన పిదుప యముని చెంత తిరోధానములో సంచరణ జరుగుతుంది. ఆ స్వామి సమయము వచ్చినపుడు సృష్టి చేస్తాడు. ఈ కాలచక్రము ఇలా తిరుగుతూనేవుంటుంది. ఓం నమః శివాయ:

11మేమూ మాది అనేటి  నేటి జనమే మిథ్యా ప్రలోభంబులో  

సామర్థ్యంబును డబ్బుతో కొలుతురే సాయంబుకైనా సరే
సామీ జంగమ జాతి నీది  అటగా  జాగ్రత్త భిక్షంబులో
ఏమీలేని మసీధరుండవు గదా ఏమిత్తురో  ఏలికా!!

12. శార్దూలము... త్రయంబకం యజామహే సుగంధిం పుష్టి వర్ధనం ఉర్వారుకమివ బంధనాత్ మృత్యోర్ ముక్షీయ మామృతాత్...

తీగెన్ తెంచుకు కింద పండు పడుటల్ తీర్మానమౌ రీతిగన్
రాగద్వేషము రాలిపోవును యిసీ రామప్రియారాధనల్
సౌగంధ్యంబను పుష్టివర్ధనునినే స్థైర్యంబుతో గొల్వగన్

వేగంగా సుమగంధ సౌరభమునే వేద్యంబుగా నిచ్చుగన్   !

13.శార్దూలము.. తస్కరాణాం పతయే నమోనమః

దారిన్ గాచెడి దొంగలందరిని సర్దారై సమర్ధింతువే
వేరే వృత్తి నివృత్తి జేసి వడిగా విత్తంబుపై చిత్తమే
స్వారీ జేయని పద్ధతేదొ దొరికే  సాయమ్మునందింతువే
ఓరీ టక్కరి శంకరా భవహరా సోపానమే నీవురా!

14.భిక్షుండే యని గేలి చేసితిరి  గంభీరాకృతిన్ జూసిరిన్

దాక్షిణ్యమ్ము నుదార రూపు శివునిన్ ధ్యానించి వేడెన్  మరిన్
దక్షున్ ప్రాణము మేకతో నిలిపెగా  తధ్యంబయెన్ ధ్యేయమే
సాక్షీభూతుడు కాలభైరవు మహా సాష్టాంగమర్పించిరిన్!

15.నందీ వ్యాఘ్రము సింహ వాహనము లున్నారూఢులౌ వారుయున్

చిందేవేసెడి బొజ్జ నొజ్జయును మోసే మూషికంబున్ మరిన్

కందుండున్  శిఖివాహనంబు నెరుగన్  కామ్యార్థ రూపంబవన్

స్పందించే ప్రతి జీవి, దేహము సహా  సర్వంబు నీలాస్యముల్ !

బొజ్జ నొజ్జ = గణపతి

కందుడు = కుమారస్వామి

16.అన్నంబై యవనీతలంబు ఖలులన్ అంతంబునొందింతురే
మిన్నున్ వాతము నాయుధంబవునుగా  మేధమ్ముకై దుర్జనుల్
విన్నేధారలు గార్చి మేఘములవే విభ్రాజ దంభోళులున్
ఎన్నోవేలుగ రుద్రమూర్తి మసలున్ ఏకాత్మతత్వంబుతో!

తా: వేలవేలు రుద్రులు గా పృథ్వి మీద అన్నరూపములో ఖలులను అంతమొందిస్తారు, అంతరిక్షంలో వాయు రూపములో చీల్చి ఖండిస్తారు , దేవతా లోకంలో వర్షము రూపములో మేఘములు ప్రకాశవంతమై పిడుగులుగా దుష్ట శిక్షణ చేస్తూ ఉంటారు. ఇదంతా చేసేది ఆ ఏకాత్మకుఁడు సాంబసదాశివుడే!!

16.సర్వం సృష్టిలయంబునుస్థితిగతిన్ సామర్ధ్యమేవ్వాడిదో
పూర్వంబున్ పరమున్ యదార్థమెవఁడో  పూర్ణంబులో శూన్యమై
నుర్వీభృత్తు  నిమిత్త చిత్తు డెవడా  నూనంబు నేతృత్వమున్
గీర్వాణుండెవడా దధీచివలె సంఘీభావనోత్సాహుడై

  17.నిర్వాణంబున కాలవాలమెవఁడో నీకాశ సోపానమై
పర్వాంతంబున లీనమున్నెవడిలో ప్రాకార మధ్యంబునన్
సర్వశ్వేతుడు శాంతమూర్తుడెవడో  సర్వస్వమున్ తానయున్
శర్వుండాత్మభవుండునీశ్వరునికే  సాష్టాంగముల్ జేతుగన్!!

.18.గంగాతీర పవిత్ర దర్భలవిగో కాలాగ్ని తత్వమ్ములై
హంగుల్జూపెడి ఫేన్యమే మెదలె నాహార్యంబు హారంబుగన్
శృంగారించిన సైకతంబు వెలసెన్ సౌందర్య లింగమ్ముగన్
చెంగల్వల్లట తేలుచున్నిలబడెన్  జీవప్రవాహంబులోన్!

19.వాడెన్ బాలుని కంఠమున్ దునుమటల్  వాటైన  శూలంబునున్

చూడన్ శాంతము చిహ్నమౌను జగతిన్ సూచించుగా న్యాయముల్

వేడెన్ రాము పినాకధారి మహిమన్ విశ్వేశ్వరున్ శంకరున్

జాడన్ జూపె పినాకమే రణమునన్ జంపెంగ కోదండమై!

20.నాశంబైనది యజ్ఞవాటిక; "నమో" నామమ్ము మార్మోగెగా    

"మే" శబ్దంబును మేళవించి యగినిన్ మేలైనదే గోర మా-

హేశుండుత్రిశతాధికంబు వరముల్;  హేఠంబు తగ్గించుటల్;

ఆశీర్వాదము నిచ్చి మెచ్చ చమకంబాయెశ్రుతీ వేదమై!

 21.అన్నంబై యవనీతలంబు ఖలులన్ అంతంబునొందింతురే

మిన్నున్ వాతము నాయుధంబవునుగా  మేధమ్ముకై దుర్జనుల్

విన్నేధారలు గార్చి మేఘములవే విభ్రాజ దంభోళులున్

ఎన్నోవేలుగ రుద్రమూర్తి మసలున్ ఏకాత్మతత్వంబుతో! 

 22.వేలం వేయు దళారులైరి అకటా వేధించు వారందఱున్

పాలించే ప్రతివాడునూ ప్రమథుడై భారంబు తగ్గింపగన్

కాలం మారెడి కోరికే నిజమయే  కాత్యాయనీనాథుడా

శూలం వాడిన సూచనే కనపడే సూక్షమ్ము జూపింపుమా!

 23వాడెన్ బాలుని కంఠమున్ దునుమటల్  వాటైన  శూలంబునున్

చూడన్ శాంతము చిహ్నమౌను జగతిన్ సూచించుగా న్యాయముల్

వేడెన్ రాము పినాకధారి మహిమన్ విశ్వేశ్వరున్ శంకరున్

జాడన్ జూపె పినాకమే రణమునన్ జంపెంగ కోదండమై!

24గంగాతీర పవిత్ర దర్భలవిగో కాలాగ్ని తత్వమ్ములై

హంగుల్జూపెడి ఫేన్యమే మెదలె నాహార్యంబు హారంబుగన్
శృంగారించిన సైకతంబు వెలసెన్ సౌందర్య లింగమ్ముగన్
చెంగల్వల్లట తేలుచున్నిలబడెన్  జీవప్రవాహంబులోన్!

25.శార్దూలము.. నీ పద సన్నిధి... ఎన్నడో..

ఏమీలేని సమంజసంబు నదియే ఏకాత్మ భిన్నత్వమున్
స్వామీ నీపద సన్నిధే సుకృతమై శాంతమ్ము శోభిల్లఁగన్
సామీప్యంబు సదా సుదీర్ఘ గతియౌ సాధ్యమ్మయే సూచనల్
భూమీవాసుల కెన్నడున్  దొరుకునో  భూతాధిపా శంకరా!

26.శార్దూలము.. |నమో దున్దుభ్యాయచా హనన్యాయచ నమో ధృష్ణవేచ ప్రమృశాయచ|

ఆయనే
1. దుందుభినాదము;
2. దుందుభియును, మ్రోగించువాడును, మ్రోగించే కర్రయూ ఆయనే;
3. వెనుదిరగని  వీరుడూ ఆయనే;
4. శత్రువుల విషయములు సేకరించి యుద్ధ సన్నద్ధుడగు ప్రతిభాశాలి ఆయనే..

కింది పద్యములో శివాంశ సంభూతుడు మారుతికియున్న అటువంటి యుద్ధ కౌశలం  వర్ణన... దశపాదముల శార్దూలము.

తోకన్ జూసి శివాంశు బోల్చక ఖలుల్ తుచ్ఛంబులాడెన్ మరిన్
నాకేయా శివుడిచ్చెగా వరమునున్ నన్నేమి జేయున్ కపిన్
శోకంబే తగుశిక్ష దూతకు నికన్ చోద్యమ్ము జేయండనిన్
మైకంబెక్కిన  మూర్ఖరావణుడు సన్మానించె వాలమ్మునున్
దూకెన్ మారుతి లంకలో పిడుగులా దుందుభ్య సందోహము-
ద్రేకంబుప్రమథాది ధృష్ణునివలెన్ రేయిన్ బగల్ జేసెగన్
ఘీకారంబులికప్రతిధ్వని మహాకేరింతలున్ జేయుచున్
రాకాసుల్ గమనించు లోపు వడిగా  ప్రాకారముల్ జ్వాలలై
శ్లోకంబున్ జపియించి సేకరణమున్ జోడీల సామర్ధ్యమున్
నీ కారుణ్యము చేతనే విజయమున్ నిశ్చింతయున్నిల్చెగన్!

శార్దూలము.. శంభోతవారాధన మకుటము.. 19 శివావతారముల వర్ణన.

మర్మంబా శని  పిప్పలాదు కధలో మాహాత్మ్యమున్ జూపగన్

నిర్మాల్యంబును  నందిరూప ధృతితో  నిర్మూలనా న్యాయముల్

కర్మన్యాసము దక్షయజ్ఞ  సమిధల్  గంభీర  భద్రుండవై

నిర్ముక్తమ్ము నిరాశ నిస్పృహ సహా నిత్యాభియుక్తుండయెన్

తీర్మానంబుగ   బ్రహ్మ మార్మెడ నయెన్  దేవీ స్థలోధ్ధారణా

ధర్మంబున్ ధరియించి రక్షణము  యాద్యంతంబుగన్  భైరవున్

ధర్మద్రోణ కుమారుతో  భరత యుద్ధమ్మే సమాప్తంబయెన్

మార్మోగెన్  శరభున్ నృసింహ రణమున్ మాయావిలాసంబుగన్

కర్మానుష్ట శివాంశతో గ్రిహపతే  ఖ్యాతిన్ గనెన్ దిక్పతై

ధార్మిక్యంబున రూపకల్పన యదార్థంబైన దుర్వాసుడున్

ఊర్మిన్ బెంచెడి రావణున్ మరణమున్ ఊహించగా  మారుతిన్

దుర్మార్గంబును జంప నీవు వృషభా  దుర్భుద్ధి దూరమ్మయెన్

ధర్మాధర్మము నీవె సాక్షి యతినాథా గ్రాహకానుగ్రహా

మర్మార్థంబును కృష్ణ దర్శనమునున్ మర్మంబుగా జూపగన్

కర్మాకర్మ విశేష శేషములు భిక్షాన్నంబుగా భోజ్యమౌ

కర్మస్వాంత కిరాతకున్ గెలిచెగా కామ్యార్థుడై పార్ధుడే

కర్మణ్యమ్మవధూత నింద్రునికికన్  గర్వమ్ము ఖర్వమ్మయెన్

దుర్మానంబు హరింప జేయు విధులున్ త్రోవేగ యక్షేశ్వరా

ధర్మాత్ముండిక  సుంతతారకునిగా దాక్షాయణిన్ గోరెగన్

కర్మాధ్యక్ష పరీక్ష యింద్రునివలెన్;  ఘాటించగన్  భక్తుడున్

మర్మంబైన సురేశ్వరుండు నిలిచెన్ మాతాసమేతుండయిన్

ధర్మస్థాపన జేసె నీ నవదశా తత్వార్ధముల్ సూక్ష్మముల్! 

ఏ భాషా పలికించలేని పలుకుల్ ఎంతేని నిశ్చింతగన్
నా భారమ్మును తానె మోయుచును  నాణ్యంబైన నాథుండయెన్
శోభాలంకృతినిన్ స్తుతింప కదిపెన్  స్తోత్రమ్ములై  పద్యముల్
సౌభాగ్యంబది నీశ్వరేఛ్చయునదే శంభోతవారాధనల్ !!

Om Saanti :

ReplyForward

..