0008

  అమ్మకు   సభక్తిపూర్వక నమస్కారములతో

  ప్రసీద మమ సర్వదా-08

  **************

 మహాగౌరి నమోస్తుతే

 "శ్వేతవృషే సమారూఢా శ్వేతాంబర ధరా శుచిః

  మహాగౌరి శుభం దద్యాత్ మహాదేవ ప్రమోదదా"

 అష్టవర్షా భవేద్గౌరీ -తల్లి ఎప్పుడు ఎనిమిది సంవత్సరముల వయసుగల మూర్తిగా దర్శనమిస్తుందట.

  ' కర్పూరగౌరం కరుణావతారం

    సంసారసారం భుజగేంద్రహారం

    సదావసంతం హృదయారవిందే

    భవం భవానీ సహితం నమామి."

   అయ్య కర్పూరకాంటివంటి తెల్లని కాంతిగలవాడని,అమ్మ బ్రహ్మచారిణిగా ఘోరతపమాచరించుటచే,నల్లని శరీరకాంతితో నున్నదని.కాళి అని స్వామి మేలమాడినందుకు తల్లి తన శరీరఛాయను ఆకాశగంగా జలముతో పునీతము చేసుకొని గౌరవర్నమును పొంది గౌరి నామధారియైనదని ఒక కథనము.స్వామి అమ్మ కన్నులు సరదగా మూసినందులకు చీకటి తల్లి శరీరకాంతిని పొందినదని మరొక కథనము.ఏది ఏమైనప్పటికిని ఆదిశక్తి తన చర్మ కాంటిని నల్లగా ప్రకటించుకొనుట-తదుపరి తెల్లగా ప్రకాశించుట లోని పరమార్థము ప్రశస్తనీయము.

  మనము ముందర చర్చించుకొనినట్లు అసురులు తమ జీవితమును-మరనమును అత్యంత ప్రత్యేకముగా తీర్చిదిద్దుకుందురు.ఆ చాతుర్యము అమ్మ వారికి ప్రసాదించినదే.కారుచీకట్లను చీల్చుకొని ప్రకటింపబడిన కాంతి కళ్యానకారకము.మహా భుజబల సంపన్నులు-బుధ్ధి సంపన్నులు మాయపొరచే కప్పబడిన వారై,మహాద్భుతములను మనకు అనుగ్రహిస్తారు.వారిమీది వాత్సల్యముతో తల్లి వారు కోరిన విధముగా ప్రకటింపబడుతూ వారిని అనుగ్రహిస్తుంటుంది.ఏ విధముగా మన అమ్మ మనతో బొమ్మలాటలాడుతూ,మన చేతి గుజ్జనగూళ్ళు ఆస్వాదిస్తూ,మనతో దాగుడుమూతలాడుతూ మనలను మురిపిస్తుందో అదే విధముగా జగన్మాత జగతితో క్రీడిస్తూ,తనలోని చిఛ్చక్తిని వివిధశక్తి రూపములుగా ప్రకటిస్తూ,పాలిస్తూ,పరమపదము చేరుస్తుంది.

   అమ్మ లీలను గారడిగా భావించే శుంభనిశుంభులు అతి చాకచక్యముతో బ్రహ్మను తమ తపముతో ప్రసన్నుని చేసుకొని( చావులేని వరమును బ్రహ్మ ప్రసాదించలేడు కనుక) అయోనిజ శరీరమునుండి జన్మించిన మరో అయోనిజ చేతిలో తక్క అన్యులచే తమకు చావులేని వరమును పొంది,అహంకారులై అఖిలజగములను అస్తవ్యస్తము చేయసాగిరి.దైవకార్య నిమిత్తము జగదంబ మానససరోవరమున మునక వేయగానే నల్లని చర్మము తల్లినుండి విడివడినది.తల్లి మహా అత్యంత గౌర వర్నముతో ప్రకాశించసాగినది.అమ్మ కఠినత్వమే కటాక్షమనుటకు నిదర్శనముగా మాత నుండి వెలువడిన నల్లని చర్మము మరొక మహత్తర శక్తియై,కౌశికి నామధారియై వెలువడి నిశుంభుని నశింపచేసింది.జగదంబ కౌసికి శుంభ-నిశుంభులను నిర్జించి తమ స్పర్శచే వారిని అనుగ్రహించిరి.తమస్సు ఉషస్సును చేరి,ఉధ్ధరింపబడినది.

.ఎంతటి దయామయి గౌరీదేవి. సాధకులు గతములో చేసిన పాపములను-వర్తమానములో చేయుచున్న పాపములను తన క్షమాగుణముతో తొలగించి వేసి,భవిష్యత్తులో పాపములు చేయని వారుగా బాగుపరచును. 

  మనలను పునీతులను చేసి సిధ్ధిధాత్రి వద్దకు 

  చేర్చుట అమ్మ సంకల్పము.

  అవరోధములను అధిగమించి అమ్మ దయను పొందుట మన 

  సంకల్పము.

 . అమ్మ చెంతననున్న మనకు అన్యచింతనలేల?

   అమ్మ దయతో మన ప్రయాణము కొనసాగుతుంది.

 అమ్మ చరణములే శరణము.