కుర్యాత్ కటాక్షం కళ్యాణి-06
******************************
ప్రార్థన
*****
అవిద్యానాం అంతస్తిమిర మిహిరద్వీపనగరి
జడానాంచైతన్య స్తబకమకరంద శృతిఝరి
దరిద్రాణాంచింతామణి గుణనికాం జన్మజలధౌ
నిమగ్నానాం మురరిపు వరాహస్య భవతి
శ్లోకము
*****
"దాసాయమాన సుమహాసా కదంబ వనవాసా కుసుంభమనో
వాసా విపంచికృత రాసా విధూత మధువాసారవింద మధురా
కాసార సూన తతిభాసాభిరామతను ఆసాద శీతకరుణా
నాసామణి ప్రవరణాసా శివా తిమిరమాసాదయేత్ ఉపరతిం."
స్తోత్ర పూర్వ ప్రస్తావనము
జగజ్జనని కదంబవనములో విహరిస్తూ సమస్త దేవతాగణములను ఆశీర్వదిస్తున్నది.మునిగణములను (తనను సేవిస్తున్న) తన పాదరజముచే తేజోమూర్తులను చేస్తున్నది.తన నీలోత్పల పాద మకరందాస్వాదన చేయుటకు సాధకుల యొక్క మనసును తుమ్మెదగా మలచమని ప్రార్థింపబడుచున్నది.సంసార సర్పమును కడతేర్చు ఆడముంగిసగా,సంసార సాగర కీలలను ఇంకింపచేయు సూర్య ప్రతాపముగా భువనములను పాలించుచున్నది.
పదవిన్యాసము.
*************
1.తిమిర మిహిరద్వీపనగరి.
ఉపరతిం ఆసాసయేత్-తొలగునట్లుచేయును గాక
తిమిరం-ఉపరతిమాసాదయేత్
-చీకట్లను-తొలగునట్లు-చేయునుగాక.
భాసా-తిమిరం-ఉపరతిం-ఆసాదయేత్
కాంతిచే-చీకట్లను-తొలగునట్లు చేయును గాక.
నాసామణి-భాసా-తిమిరం-ఉపరతిం-ఆసాదయేత్
ముక్కెర మణి కాంతులచే -చీకట్లను-తొలగునట్లు చేయును గాక.
శివా-నాసామణి-భాసా-తిమిరం-ఉపరతిం-ఆసాదయేత్
శివాని/శుభంకరి-తన ముక్కెర-కాంతిని ప్రసరించి-చీకట్లను-తొలగునట్లు-చేయును గాక.
" కాలకంఠి-కాంతిమతి-కమలాక్ష నిసేవితాయై నమో నమః."
ప్రస్తుత వాక్యములో చీకటి-వెలుతురు అను ద్వంద్వములు ప్రస్తావించబడినవి.
అమ్మ జగములను తన
"నిజారుణ ప్రభాపూర మజ్జత్ బ్రహ్మాండ మండల గా " తన అరుణకాంతి యను కరుణతో బ్రహ్మాండముల చీకట్లను తొలగించి-ప్రకాశవంతము చేస్తున్నది.
అమ్మకాశి విశాలాక్షి-కాంతిమహాదేవి.
అమ్మ జగములతో పాటు,జగదీశ్వరుని సైతము,
'మందస్మిత ప్రభాపూర మజ్జత్ కామేశ మానసా"
తనమందస్మితకాంతులతో మహాదేవుని మానసమును మునకలు వేయిస్తున్నది.
" చీకటిలోని ఏ వస్తువును చూడవలెనన్న దానిని తొలగించగలిగిన కాంతి అవసరము.అనగా చీకటిని అధిగమించగలిగిన సామర్థ్యమును కాంతి కలిగియుండవలెను.లేనిచో ఆ కాంతి తన పరిధిని దాటి,చీకటిలో నున్న వస్తువును చూపించలేదు పూర్తిగా."
పరమేశ్వరి తన నాసామణి నుండిప్రసరింపచేస్తున్న కాంతి మండలము బ్రహ్మాండమండలములోని చీకట్లను పూర్తిగా తొలగించవేయగల తేజోమండలము.
అనగా,
" సకల కాంతి పదార్థములు పరమేశ్వరి నుండియే కాంతిని పొందుచున్నవికాని,పరమేశ్వరికి కాంతినీయగల పదార్థమేదియును లేదనుట నిస్సందేహము."
స్వయంప్రకాశక స్వరూపుణి ఆ జగజ్జనని.
కనుకనే దశమహావిద్యలలో చూపినట్లు కాళి విద్య నుండి నాదము-ప్రకాశము అను రెండు లక్షణములను తనకు తానే ప్రకటించుకొనుచు,తారాదేవి ఉద్భవించినది రెండవశక్తిగా.
మహాకవి ప్రస్తావించిన ప్రకాశ ప్రసరణము అమ్మవారి నాసామణిలోని ముక్కెర మణి కాంతి.అత్యద్భుతము.అద్వితీయ ఆవిష్కరనము.
ముక్కెర ప్రాశస్త్యమును గ్రహించుటకు పూర్వము అమ్మవారి ముక్కును,
" శరత్చాంపేయ పుష్పాభ నాసికాయై నమోనమః"అని స్తుతించుటలోని భావమేమిటి?
అమ్మ నాసిక కిందకు వంగియున్న సంపెంగ పూవు వలె నున్నదట.తుమ్మెదలు వాలుట కొంచము కష్టము.అంతే కాదు మకరందము కానరానిది.షట్పదము గ్రోలవలెనన్న ఆసక్తినికలుగచేయనిది.అమ్మ నాసిక మందార మకరంది.నిగూఢ మాథుర్యము కలది..
ఇహములనే ఉపాధిని.ఇంద్రియములు-మనసును సామాన్యమైన/సాధారణమైన తృష్ణతో ఆరురెక్కలతో వచ్చి సేవించుటకు వాలనీయనిది.అమ్మ అనగాద్భుత చారిత్ర.
అమ్మ
"తారాకాంతి తిరస్కారి నాసాభరణ భాసురా" స్వయంప్రకాశక శుక్రతారాదుల కాంటిని సైతము తోసివేయునది.
జనని కుడిముక్కునకు పగడపు ముక్కెర-ఎడమ ముక్కునకు వజ్రపు ముక్కెరను ధరించియున్నది.శుక్లశోణితములు.వాటి రెండింటి మధ్యన తనముక్కుదూలము అంచున సత్వగుణ సంశోభితమైన ముత్యమును ధరించినది.
పగడము-వజ్రము-ముత్యము సత్వ రజోగుణ సంకేతములు.పునఃసృష్టి సూచనములు.
తమోగుణమునకు తావులేదు.నాసిక అజపామంత్ర సంకేతము.
తిమిరమును ఏ మాత్రము కానరానీయని అమ్మ నాసాభరణ మణికాంతులు అజ్ఞానమనే నా చీకటులను తొలగునట్లుచేయును గాక.
2.అనఘాద్భుత సౌందర్య శరీరాయై నమోనమః.
జగదంబ
, తనుః-శరీరము కలది
అభిరామ-తనుః-సొగసైన శరీరము కలది
భాసా-అభిరామ-తనుః
ప్రకాశిస్తున్న-సొగసైన-శరీరము కలది.
తతి-భాసా-అభిరామ-తనుః
కాంతి సమూహములతో నిండిన సొగసైన శరీరము కలది.
సూన-తతి-భాసా-అభిరామ-తనుః
పూలకాంతి సమూహలతో ఒప్పుచున్నసొగసైన శరీరము కలది.
కాసార-సూన-తతి-భాసా-అభిరామ-తనుః
సరోవరములోని పూల కాంతుల సమూహములతో తేజరిల్లు శరీరము
కలది
అమ్మ,
దాసాయమాన-సుమహాసా
పువ్వుల నవ్వులను తన దరహాసముతో ఓడించి,పువ్వులను తన దాసీజనముగా అనుగ్రహించినది.
సు-మహసా- సుమనస్కులైన వారికి సేవాసౌభాగ్యమును అనుగ్రహించినది.
సుమ-హాసా-తన నవ్వులను పూలనవ్వులతో పోల్చే వరమును పూలకు అనుగ్రహించినది.
అమ్మ మహాపద్మాటవీ నివాసా.
4.
కళ్యాణి,
కదంబవనవాసా-కదంబ వనవాసిని
కుసుంభ సుమనో వాసా-కుంకుమపూవు వంటి పరిమళవస్త్రమును ధరించినది.
తల్లి-అలంకరనము-అంతరంగము కరుణా సముద్రమే.పరిమళ ప్రకాశమే.వాటి వ్యాపనమే
విపంచికృత రాసా-తనలో దాగలేక ఉరకలేయుచున్న వీణానిక్వణము.
తల్లిని తన మానసమనే వనములో సంచరింప చేసే,
"మాన వనచర సంచారము చేసే వారెందరో మహానుభావులు.అందరికి వందనములు.
ఆ చల్లని తల్లికరుణను నాపై వర్షించును గాక.
మహాకవి,
శివా-కుసుంభ సుమనోహాసా-దాసాయమాన సుమహాసా-నాసామణి ప్రవర భాసా అన్న పదములలో అమ్మవారిప్రసాదగుణ మకరందమునుచేర్చి-అభిషేకించారు.
మరియు
1.శివాన్-మంగలం-అస్యాత్--మంగళకారిణి శివాని
2.శివస్య పత్నిః శివా-శివుని పత్ని శివాని
3.శివా శక్తిః సముఖ్యాత-శివుని శక్తి- శివాని
4.మోక్షే-భద్రే-సుఖే -శివా-మోక్షమును-భద్రతను-సుఖమును ప్రసాదించునదిశివాని,
అంటూ బహుళ అన్వయములతో " శివా" అను రెండు అక్షరముల ద్వైతముగా ప్రకటింపబడుచున్న ఒకటిగా ,
దాసాయ-హాసా.వాసా.భాసా,నాసా,ఆసార,కాసార,ఆసాదయేతను శబ్దములతో సా అను అక్షరమునుపునరావృతముచేస్తూ నాదభూషణములను అలంకరించారు.
సర్వం శ్రీమాతా చరణారవిందార్పణమస్తు.
అమ్మదయతో అర్చనకొనసాగుతుంది.
No comments:
Post a Comment