SAUNDARYA LAHARI-58

 సౌందర్య లహరి-57

 పరమపావనమైన నీ పాదరజ కణము
 పతితపాలకమైన పరమాత్మ స్వరూపము

 ఎడమనేత్ర కాంతిమారె లక్ష్మితత్వముగ
 ఎడతెగక నడిపించె స్థితికార్యపు మాతృకగ

 కుడినేత్ర కాంతిమారె పార్వతితత్వముగ
 విడనాడక కాపాడగ కరుణకు ప్రతిరూపముగ

 మూడవ నేత్ర కాంతిమారె సరస్వతి తత్వముగ
 మూఢత్వము తొలగించగ సారస్వత రూపముగ

 ఉద్ధరింపగ మమ్ములను ముగ్గురమ్మలను అందించిన
 నీ ఊపిరి నాలుగు వేదములైన వెలుగుచున్న వేళ

 నీ మ్రోలనేనున్న నా కేలు విడనాడకమ్మా,నా
 మానస విహారి ఓ సౌందర్య లహరి.


 "విద్" అను ధాతువునకు తెలియుట అను అర్థమును మనము అన్వయించుకుంటే భగవంతునిద్వారా తెలుపబడినవి "వేదములు." వీనిని శృతులు-ఆమ్నాయములు-అపౌరుషేయములు అని కూడా కీర్తిస్తారు.కావలిసిన వాటినిచ్చి,అక్కరలేని వాటిని దగ్గరకు రానీయని శక్తిగలవి వేదములు.వేదము అనగా జ్ఞానము-నిజము అని కూడా అర్థముచేసుకోవచ్చును.వేదరాశి వ్యాసమహర్షిచే, నాలుగుగా క్రమబద్ధీకరించబడినవి.అవి ఋగ్వేదము-యజుర్వేదము-సామవేదము-అధర్వణవేదము. ఆది శంకరులు ప్రశంసించిన ఋగ్వేదము కామితార్థప్రదము.యాగ విధానమును తెలియచేయునది యజుర్వేదము.ఉపనిషత్తులను కలిగి సంగీత ప్రాధాన్యము కలది సామవేదము.మూడు వేద పఠనములలో దొర్లిన తప్పులను సరిచేయ సామర్థ్యము కలది అధర్వణవేదము.దీనిని పఠించే బ్రహ్మలు నిష్ణాతులైయుంటారు.(మహా భారతము పంచమ వేదముగా ప్రసిద్ధికెక్కినది.) శ్రీమాత ఊపిరులే శ్రీకర వేదములని అవగతమగుచున్న సమయమునచెంతనేనున్న నాచేతిని విడిచిపెట్టకమ్మా.అనేక వందనములు.