SAUNDARYA LAHARI-64

  సౌందర్య లహరి-మహా లక్ష్మి-63

  పరమపావనమైన  నీ పాదరజకణము

  పతిత పాలకమైన  పరమాత్మ స్వరూపము

  పువ్వులలో-ఫలములలో -ధాన్యములో-గడపలో

  ముత్యములలో-మణులలో-వృక్షములలో-గోమాతలో

  శంఖనాదములలో-శుభ గంటా నాదములలో

  త్రిగుణాత్మక దీపములలో-తులసికోట మూలములో

  ఆదిలక్ష్మి-ధాన్యలక్ష్మి-ధనలక్ష్మి-వీరలక్ష్మి

  విద్యాలక్ష్మి-విజయలక్ష్మి-సంతాన లక్ష్మి-మహాలక్ష్మిగా

  పలురూప నామములలో పరిఢవిల్లు నిన్ను చూచి

  పాహిమాం-పాహిమాం అనుచు భక్తులు ప్రస్తుతించుచున్న వేళ

  నీ మ్రోలనే నున్న నాకేలు విడనాడకమ్మా,నా

  మానసవిహారి !ఓ సౌందర్య లహరి. 

 .

 " యాదేవి సర్వభూతేషు లక్ష్మీ రూపేణ సంస్థితా" లక్ష్ అను ధాతువునుండి ఏర్పడిన పదము లక్ష్మి.లక్ష్యమును  నెరవేర్చునది లక్ష్మిదేవి.సర్వశుభలక్షణత్వమే లక్ష్మీతత్త్వము.నారాయణునికి  స్థితికారకత్వమునందు-సర్వ వ్యాపకత్వమునందు సహాయకారియైన తల్లి భృగు మహర్షి-ఖ్యాతి సాధ్విని కుమార్తెగా అనుగ్రహించి,భార్గవి నామముతో ప్రసిద్ధికెక్కినది.సనత్కుమార సేవిత హరికింపట్టపుదేవి-పున్నెముల ప్రోవు అయిన లక్ష్మీదేవి,శ్రావణ మాసములో వరలక్ష్మి రూపములో,దీపావళి పర్వదినమున ధనలక్ష్మిగా,శ్రీ పంచమి యందు విద్యాలక్ష్మిగా,నవరాత్రుల శమీపూజ యందు విజయ లక్ష్మిగా,మార్గశిర మాసమున గురువార మహాలక్ష్మిగా ఇంకా ఎన్నెన్నో నామములతో-రూపములతో మనలను అనుగ్రహించుచున్న తల్లిని "కరాగ్రే వసతే లక్ష్మీ" అంటూ దోసిలిలో దర్శించుచున్న సమయమున చెంతనే నున్న నా చేతిని విడిచిపెట్టకమ్మా.అనేక వందనములు.