మార్గళిమాలై-23
*************
ఇరవదిమూడవ పాశురం
*********************
మారిమలై ముళింజిల్ మన్నికొడందు ఉరంగం
శీరియసింగం అరిఉత్తు త్తీవిళిత్తు
వేరి మయిర్ పొంగ వెప్పాడుం పేరొందు ఉదరి
మూరి నిమిరిందు ముళంగి పురప్పట్టు
పోదరుమా పోలే ,నీ పూవై పూవణ్ణా! ఉన్
కోయిల్ నిన్రు ఇంగనే పోందరుళి,కోప్పడయ
శీరియసింగాసనత్తు ఇరుందుయాం వంద
కారియం ఆరాయందు అరుళ్ ఏలోరెంబావాయ్.
తల్లికి క్షమాపణాభ్యర్థనలతో.
శ్రీకరము శుభకరము భవహరణము శ్రీవ్రతము
శ్రీగోదా రంగనాథుల అనుగ్రహము అనవరతము
వర్షాకాలములోన కొండగుహలో నిదురించుచున్న
సింహ కిశోరము మేల్కొని కాళ్ళను చేరచాచి
జూలును విదిలిస్తు-గంభీర గర్జనను చేస్తూ
అడవిని పాలింప గుహవీడి వెడలు శోభ
ఓ పురుష సింహమ! నిదురను చాలించి నీవు
ధీర గంభీర నడకను దారిని ఉధ్ధరిస్తూ
విరగబూసిన అవిసెల విభవమలర.ప్రేమతో
గోకులమును పాలింప వేగమే కదలిరమ్ము
కువలయమునంతటిని కూర్మితో కుశలమడుగుచును
సింహాసనమును చేరి, కైంకర్యములు స్వీకరించు.
ఈ పాశురములో గోదమ్మ వర్షాకాల సమయమున స్వామి తన సివంగితో సీరియ సింగము వలె నిదురిస్తున్న కొండగుహ వద్దకు గోపికలను తీసుకొని వచ్చినది.ఒక్కొక్క పాశురములో గోపికలు భగవత్తత్త్వమునకు ఒక్కొక్క మెట్టు ఎక్కి దగ్గరవుతున్నారు.భగవంతుడు ఒక్కొక్క మెట్టు దిగి వారిని చేరదీసుకుంటున్నాడు.వీరిద్దరి సంధాన కర్తగా ఆచార్యులు(గోదాదేవి) దగ్గరుండి నిర్వహించుచున్నది.
క్రిందటి పాశురములో గోపికలు స్వామి నిద్రమేల్కొను సౌందర్యమును అనుభవించినారు.స్వామి మధుర వాక్కులలో స్నానమాడినారు.దాని ప్రభావమో ఏమో నర్మగర్భముగా స్వామిని గుహవీడి తన నడక సౌందర్యమును ప్రసాదించమంటున్నారు.సీరియ సింగము వలె నడచివచ్చి సకల భువనములను తన స్పర్శతో పునీతము చేసి పెద్ద సిమ్హాసానము నధిష్ఠించి,అనుగ్రహించ మంటున్నారు. ఇది వాచ్యార్థము.
విజ్ఞుల వివరణ ప్రకారము వర్షాకాలము.చీకటి గుహ అందులో తన జంటను కలిసి నిదురించుచున్న సిమ్హము.మూలతత్త్వ స్థికి ప్రతీక.వీరి ప్రార్థనలు స్వీకరించి,స్థితి గతిగా -గతులుగా తన మూల తత్త్వమును విస్తరించుకొనుచున్నది.అదియే ప్రళయానంతరము కలుగు రజోగుణోద్భవమును స్వామి ఎర్రని కన్నులతో సూచించు చున్నది గోదమ్మ.కాళ్ళను చేర చాచుట పాంచజన్యుని నుండి పంచభూత విస్తరణ.జూలు విదిలించుట దశదిశావిర్భావము.
భయానకమైన మూలతత్త్వములో దాగిన చేతనము పరమాత్మానుగ్రహముతో విస్తరించి కుసుమ కోమలమై,చీకట్లను తెంచుకొని ప్రకాశించ సాగినది.స్వామి పాదస్పర్శతో పావనమైన జగతి పులకించినది.సామాన్య కారణ-కార్య సంబంధమునకు (ఉపాదాన కారణము-నిమిత్త కారనము-సహాయ కారణము) అను మూడు కారణములు అవసరము.కాని తనలో అన్ని దాచుకొని " ఒకపరి జగముల వెలువల్ మరొకపరి లోపల" దాగు వానికి వాటి అవసరములేదు.స్వామి అనుగ్రహమేమో సాలెపురుగు కూడ గూటి నిర్మాణ సమయమున కారణములను వ్యక్తముచేస్తు,కార్యమును సాధిస్తుంది.
" మారిమలై ముళింజిల్" వర్షాకాలమున కొండగుహలో శివంగి తో కలిసి నిదురించుచున్నది వీర కిశోరము.కాని చూస్తే ఒకటి గానే కనిపిస్తున్నది చర్మ చక్షువులకు.
మారి -వర్షము ఒకటే వర్షము.చుట్టును జలమయము.అంతా చిమ్మచీకటి.చీకటికొట్టు లో ఒక సిమ్హము నిదురించుచు రెండుగా మనము భ్రమపడునట్లు చేయుచున్నది.సమస్త ప్రకృతి జలమయమై స్వమిని ఆశ్రయించి,అంతర్లీనమైనది.ప్రకృతి-పురుషుల దివ్య సంగమంది.తటస్థస్థితి.ఆ స్థితి నుండి జాగరూకుడవు కమ్మని,గుహను వెడలి నడచివచ్చి,తమను అనుగ్రహించమని వేడుకుంటున్నారు.మొరను ఆలకించినది.లేచినది,ఎర్రని చింత నిప్పుల వంటి కళ్ళతో పరిసరములను పరికించినది.అంతా రజోమయము.వెంటనే గర్జించినది.అది ప్రణవము.కాంతి-శబ్దములు ప్రభవించిన తరువాత తన కాళ్ళను ముందుకు సాచి,వళ్ళు విరుచుకొనినది.ఈ ప్పుదే పాంచజన్యుని నుండి పంచభూతములు విస్తరించుట మొదలుపెట్టినవి.దశదిసలు గుట్తలు,నదులు,జీవులు కొత్తరూపును దిద్దుకుంటున్నవి.అదియే జూలును విదిలించుట.
పురుషుని స్వభావము మారినది.గాంభీర్యత తోసివేసి సౌకుమార్యము చోటుచేసుకొనినది.సింహము వంటి స్వామి అవిసెపూల వంటి సౌకుమార్యమును సంతరించుకున్నాడు.
చతుర్వర్గ గతులతో స్వామి అడుగులు వేస్తూ,నడిచివచ్చి సింహాసనారూఢుడైనాడు..తన స్పర్శతో సమస్తము పునీతమైనది.సఖ్య భక్తి దాస్యభక్తిగా మారి స్వామి సింహాసనము క్రింద కూర్చుని సంతసించుచున్నది.
( ఆండాళ్ దివ్య తిరువడిగళే శరణం.)
No comments:
Post a Comment