SIVA SANKALPAMU-86

ఓం నమః శివాయ-86 ***************** నిన్నే సొంతమని సేవిస్తే సుంతైనా కానరావు ఎంతలేసి మాటలనిన సొంతమని అంటావు నిన్నుచూడ తపియించగ నిరీక్షణే మిగుల్చుతావు నువ్వెంతన్నవారి ముందు ప్రత్యక్షము అవుతావు కరుణించే వేళలలో కఠినముగా ఉంటావు లెక్కలేదన్న వారిపై మక్కువ చూపుతావు మనసును కట్టేయమంటే బెట్టు ఎంతో చేస్తావు కట్టుబాటు లేనివానిని కట్టి పడేస్తుంటావు ముసలితనము వచ్చినా ముక్కిమూల్గమంటావు పసికందుల హతమార్చి కసితీర్చుకుంటావు నీ పనులప్రభావము నీకసలు తెలియదుగా మక్కువలేదంటున్నారురా ఓ తిక్కశంకరా. శివుడు నువ్వు లేవని,నిన్ను లెక్కచేయనని,మోసగాడివని,నీ అవసరము నాకు లేదని,నీకు ప్రీతికరమగు విధముగా నేనెందుకు ఉండాలని తర్కము చేసే మంజునాథుడి లాంటి వారిపై మక్కువ చూపిస్తాడు కాని భక్తితో కొలిచే వారికి,అనుగ్రహమునకై పరితపించే వారిపై నిర్లక్ష్యమును చూపుతు,సందర్భోచితము కాని కాని పనులను చేస్తుంటాడునింద. ప్రత్యక్షము నమః శివాయ-పరోక్షము నమః శివాయ విరుధ్ధము నమః శివాయ-సన్నధ్ధము నమః శివాయ నమః శివాయ నమః శివాయ ఓం నమః శివాయ " ఆద్యాయామిత తేజసే శ్రుతివదైః వేద్యాయ సాధ్యాయతే విద్యానంద మయాత్మనే త్రిజగతః సంరక్షణోద్యోగినే ధ్యేయాయాఖిల యోగిభిః సురగణైః గేయాయ మాయావినే సమ్యక్తాండవ సంభ్రమాయ జటనే సేయం నతిశ్శంభవే" శివానందలహరి. ఆదిదేవుడు,అమితమైన తేజశ్శాలి,వేదవచనములచే తెలియబడువాడు,విద్యానందమయుడు,ముల్లోకములను సంరక్షించుచు( దానిని సామాన్య మనసులకు తెలియనీయకుండ మాయ అను పొరను కప్పువాడు) గొప్ప తాండవమును చేయుచు,జగములను రమింపచేయు శివునకు నమస్కారములు.-స్తుతి. ఏక బిల్వం శివార్పణం.