శివ సంకల్పము-61
పట్టుబడతానన్న భయముతో పరుగుతీసిన దొంగ
ప్రదక్షిణము చేసానని ప్రగల్భాలు పలుకుతాడు
సోమరియై నిదురబోవు తామసియైన దొంగ
నిష్కళంక సమాధియని నిష్టూరలాడతాడు
సందుచూసి విందుభోజనము చేయు ఒకదొంగ
వివరపు నైవేద్యమంటు వింతగ మాటాడుతాడు
కడతేరుస్తారేమోనని కవచధారియైన దొంగ
కానుకగా నా ప్రాణమంటు పూనకమే పూనుతాడు
మాయదారి పనులనే మానస పూజలంటుంటే
ఆయాసము లేకుండా ఆ యశమే కోరుతుంటే
పోనీలే అనుకుంటూ వారిని నువు ఏలుతుంటే
మొక్కాలిరా నీకు ఓ తిక్కశంకరా.
No comments:
Post a Comment