ఓం నమో నారాయణాయ-10

" శ్రీ విష్ణుచిత్త కులనందన కల్పవల్లీం
శ్రీ రంగనాథ హరిచందన యోగ దృశ్యాం
సాక్షాత్ క్షమాం కరుణయా కమలామివాన్యాం
గోదామనన్య శరణం - శరణం ప్రపద్యే"

ఓం నమో నారాయణాయ-10

విచిత్రముగ నామది శ్రీవిల్లిపుత్తూరుగా మారినది
విష్ణుచిత్తీయమై శ్రీహరినామ సంకీర్తనమే కోరుతోంది

ప్రభువుల,పడతుల,ద్విజుల కర్తవ్యపాలనమైన
నెలకు, ఆరక కురియుచున్న మూడు వానలలో

బురద అంటనీయని వైరాగ్యపు భాష్యమైన
"మణి కైరవ" దిగుడుబావి విరబూసిన తామరలలో

పూర్వ పుణ్యఫలముగా యోగ తాదాత్మ్యమైన
అంభోరుహనేత్రి పోవుచున్న కుంభకర్ణుని నిద్రలో

'ఉడైయార్ ఆరుఙ్ లమే"అని అగస్త్యుని తలపించినదైన
^
అమ్మ కీర్తించుచున్న ఆ ఆభరణపు పాశురములో

తెల్లవార వచ్చెనమ్మ చెలులారా రారె
తెల్లబరచగ భక్తిపూల మాలలతో నేడె.

భావము

సస్య శ్యామలతకు కారణమైన వానలలో,బురదలోనుండి పుట్టినప్పటికిని,ఏ మాత్రము అంటనీయకుండా ప్రకాశించే పద్మాలలో (మహాను భావులైన ఆళ్వారులలో) ( శ్రీ రామానుజులులా) గోపిక యొక్క యోగ తాదాత్మ్యములో,"ఉడైయార్ ఆరుఙ్ లమే" అని అమ్మచే అన్యాపదేశముగా కీర్తింపబడుచున్న అగస్త్య మునిలో,జ్ఞానాభరణ ...^... పాశురములో నిమగ్నమైన నా మనసు,పాశురములను కీర్తించుచు,భక్తి అను పువ్వులను,శరణాగతి అను దారముతో అల్లిన హారములను,స్వామికి సమర్పించుటకు,చెలులారా! కదిలి రండి.తెల్ల వారుచున్నది.

( ఆండాళ్ తిరువడిగళే శరణం )