OM NAMA SIVAAYA-74

  ఓం నమః శివాయ-74
  ***************

 వెండికొండ దేవుడవని వెండికొరకు నే వస్తే
 దండిగా ఉన్న మంచు వెండివెండి నవ్వింది

 మేరుకొండ విల్లుందని మేరువుకై నేవస్తే
 చాటుగా ఉన్న విల్లు చిలిపిగా నవ్వింది

 రాగిజటాజూటమని రాగికొరకు నేవస్తే
 విరాగియైన జట మరీ విచిత్రముగా నవ్వింది

 నీలలోహితుడవని ఇనుముకొరకు నేవస్తే
 చాల్లే అంటూ విషము గేలిగా నవ్వింది

 కుబేరుడు ముందున్నాడని ధనమునకై నేవస్తే
 చేతులు కట్టుకున్నానని చేతకాక నవ్వాడు

  ఎండమావులను నీళ్ళనుకుని కుండపట్టుకు వచ్చిన,

   నా ఎక్కిళ్ళని ఆపవేర ఓ తిక్కశంకరా.


' రుద్రచమకములో శివుడు "హిరణ్యంచమే-సీసంచమే-త్రపుశ్చమే-శ్యామంచమే-లోహంచే ' అన్ని లోహములను పొందినవాడును-అనుగ్రహించగలిగిన వాడును అని చెప్పుకున్నాడని,భక్తుడు వాటికొరకు శివుని సమీపించి,ఘోరముగా పరాభవింపబడినను శివుడు చేతకాని వాడిలా కదలక మెదలక ఉన్నాడు.-నింద.

  పసిడి నమః శివాయ-వెండి నమః శివాయ
  రాగి నమః శివాయ -సీసము నమః శివాయ

 నమః శివాయ నమః శివాయ ఓం నమః శివాయ.

  రుద్రనమక-చమకముల అంతరార్థము అర్థముకానిది.కాని అద్భుతమైనది.లోహములను వివరించు చమకము ఐదవ అనువాకములో వాటిలో దాగిన అంతరార్థములను అలంకారికులు విశ్లేషించినారు.బాహ్య వాచకార్థమునకు ఇవి లోహ నామములే అయినప్పటికిని,ఆధ్యాత్మికముగా అన్వయించుకుంటే సాధకుని ఆధ్యాత్మిక పయనములోని అడ్దంకులను తొలగించి-అభ్యున్నతిని సూచించు అత్యద్భుత ప్రణాళికలు.ఉదాహరణకు హిరణ్యంచమే-బంగారము అనునది సామాన్యార్థము.కాని నిశిత పరిశీలకులకు హితం-రమ్యం హిరణ్యం గా అర్థమవుతుంది.హితమును కలిగించునది-రమ్యమైనది హిరణ్యం.అంతే పరబ్రహ్మ జ్ఞానము.అదే విధముగా సీసంచమే అను పదము "సినోతి బధ్నాతి  సర్వ బుధ్ధీం ఆధ్యాత్మికే ఇతి సీసం" జనుల బుధ్ధివృత్తులను ఆధ్యాత్మికత యందు బంధించెడి భావము.సాధకులు-జ్ఞానులు పొందెడి భావము ఇనుము.రాగి మొదలగు లోహములన్ "లూఞ్-ఛేదసే" జనుల బుధ్ధులను అన్నివైపులనుండి ఛేదించి,ధ్యానముపై కేంద్రీకృతము చేయించే స్వభావము.ఈ విధముగా కొన్ని భావములు ఆధ్యాత్మికతకు కలుగు అడ్దంకులను తొలగించుచుంటే మరి కొన్ని సుగమము చేయుచు సాధకుని ప్రయత్నమును(యజ్ఞమును) సఫలీకృతము చేయును.స్తుతి.

 ఏక బిల్వం శివార్పణం.

.