ఓనమాలు (Onamaalu)

దక్షిణము-తూర్పు మధ్యభాగమైన ఆగ్నేయమూలాధిపతి మూడు చోట్ల మూడు రకములుగా వ్యాపించియుంటాడని ఇతిహాసము నమ్ముతుంది. 1భూమి మీద అగ్నిరూపముగాను 2పర్యావరనములో కాంతిరూపముగాను 3.ఆకాశములో సూర్య రూపముగాను విధులను నిర్వహిస్తుంటాడు అని వేదోక్తము. అంతేకాకుండా ఒకచోట నున్న శక్తిని వేరొకచోటికి అనుకూలముగా మారుస్తూ అందచేసే నిపుణుడు అగ్ని.ఉపనిషద్ విజ్ఞాన రహస్యమును కూడా అగ్నిగానే గౌరవిస్తారు. ఆద్యంతరహితుడైన జాతవేదుడు ఎన్నో తరములను దర్శించియున్నాడు.వారికి కావలిసిన శక్తిని తాను ముందు వహ్నిగా గాలితో పాటు సంచరిస్తూ,యజ్ఞయాగాదులందు దేవతలకు తనద్వారా హవిస్సులను అందచేస్తూ,తత్ఫలితములకు సహాయపడుతు ,వ్యర్థములను హుతముచేస్తూ జగత్ సంరక్షణమును చేస్తుంటాడు.

పశ్చిమ-ఉత్తరదిక్కుల మధ్యన గల వాయవ్యమూలకు అధిపతిగా గంధవతి నుండి అడ్దంకులను తొలగించుచు,పంచభూత సమన్యమును కలిగించుచున్న వాయువు మరోపేరు అయిన "వాత" నామమునకు గుర్తుగా వాతావరణము అను పదము ప్రసిధ్ధికెక్కినదని పెద్దల అభిప్రాయము. వేదోక్త ప్రకారముగా యజ్ఞ-యాగాదులలోని సోమరస ప్రథమ గ్రహీతగా వాయుదేవుడు కీర్తింపబడుతున్నాడు.

ఇదం ద్ర ఇంద్ర అన్నారు పెద్దలు.ద్ర గమనిస్తుందో-ఏది మన కదలికలను గమనిస్తుందో అది ఇంద్రుడు.దానికి కల సాధనములు ఇంద్రియములు.ఉత్తర దిక్పాలకునిగా కీర్తింపబడుతున్న ఇంద్రుడు గోచరముకాని మనలకు గోచరించుచున్న కదలికలకు కారణమైన బ్రహ్మపదార్థము.నింగి నేలకు సామరస్యమును కూర్చు సాధనము. పురంధరునిగా ప్రస్తుతింపబడుచున్న నదీజలముల నడకకు కావలిసిన పరిస్థితులకు పర్వతములను నియంత్రిస్తూ,సూరెయకాంతిని అవరోధిస్తున్న ప్రతికూల పరిస్థితులను తొలగిస్తూ,స్థితికార్యమునకు సహాయపడుతున్న అద్భుత శక్తి కనుకనే 'వృత్రఘ్న" గా అడ్డంకులను అడ్డగించే ప్రజాపతి. పురాణకథనము ప్రకారము ఐరావత వాహనుడుగా సచీసమేతుడై వజ్రాయుధమును ధరించి లోకసంరక్షకునిగా కీర్తింపబడుతున్నాడు.

కుబేరుడు ********** ఇతిహాసములననుసరించి కుబేరుబి పులస్త్య ముని మనుమనిగాను,విశ్రవకుమారునిగాను భావిస్తారు. వైశ్రావణ నామమును కీర్తిస్తారు. కు బేర బేరము అను పదమునకు శరీరము అను అర్థమును కనుక అన్వయించుకుంటే వికృత శరీరునిగా,మరుగుజ్జు రూపముతో,ధనరాశుల మూటను పట్తుకుని,పెద్దబొజ్జతో,పింగళాక్షునిగా సాకారతను వివరిస్తరు. కు అను అక్షరమునకు భూమండలము అను అర్థమును స్వీకరిస్తే బేరుడు నాయకుడు గా మనము భూమండలమునకు సంపదలనొసగు నాయకునిగాను మనము అన్వయించుకోవచ్చును. అలకాపురిని నివాసముచేసుకొని ఉత్తరదిక్భాగమునకు పాలకునిగా నున్న కుబేరుడు మహాభారత కథనము ప్రకారముగా బ్రహ్మచే ధనాధిపతిగాను,శివమిత్రునిగా కామేశునిగాను,దుష్ట పరిహారకునిగాను వరప్రసాదితుడైనాడట. నాగులను జయించిన సంకేతముగా ముంగిసపై కూర్చున్న విగ్రహములుకూడా మనకు దర్శనమిస్తుంటాయి. విద్యాధరులు-కింపురుషులు-రాక్షసులు కుబేరుని సభకు విచ్చేసి,పరిపాలనలో అనుచరులుగా వ్యవహరిస్తారను నమ్మకము కూడా కలదు.ఎన్నో గుప్తశక్తులను నియంత్రిస్తుండుట వలన గుహ్యకాధిపుడుగా కుబేరుడు విష్ణుధర్మోత్తర పురాణ కథనము ప్రకారము అర్థమునకు మాత్రమే అధిపతిగా కాక అర్థశాస్త్రమునకు కూడ ...

నిరుతి దిక్పాలకురాలు/దిక్పాలకుడు ద్వంద్వమయములైన ప్రకృతిలోని దక్షిణ-పడమర మధ్య ప్రాంతములోని కృష్ణజ్ఞాన నగరమూ దీర్ఘాదేవి సహితుడు ఒక్కొక్కసారి అశ్వవాహనుడుగా/మరొక్కసారి నరవాహనునిగా దర్శనమిస్తుంటాదని పెద్దల అభిప్రాయము. సంస్కృత భాష "నిరుతి" అను పదమును క్రమశిక్షణారాహిత్యము,అజ్ఞానాంధకారముగాను,అధర్మముగాను నిర్వచిస్తుంటుంది. జ్యోతిష్య శాస్త్రము మూలానక్షత్రాధిపతిగా విశ్వసిస్తుంది. పతనమునకు వాడు పదముగాను నిరుతిని విశ్వసిస్తారు. మంచి-చెడుల మిశ్రమమున చెడును గుర్తించి,నిర్మూలనమునకు సహాయపడేవానిగాను సన్నుతిస్తారు.

పశ్చిమాధిపతియైన వరుణుని పురాణములు కశ్యపప్రజాపతి కుమారునిగాను,వశిష్టుని తండ్రిగాను భావిస్తాయి.ఈయన నివాసమును శ్రధ్ధావతిగాను,శక్తిని వరుణిగాను కీర్తిస్తారు.మొసలి వాహనునిగా భావిస్తారు. చుట్టుకొనుట అనే అర్థములో వరుణ పదమును భావిస్తే,భూమ్యాకాసములను చుట్తుకొనియున్నవాడు అని కూడా అంటారు.వీరి విభాగములు కర్తవ్యములు కాలానుగుణముగా మారే అవకాశమున్నందువలన,అంతరిక్షవిభాగమునకు అదనముగా జలవిభాగ నియంత్రనమును కూడా నిర్వహిస్తున్నట్లు శాస్త్రజ్ఞుల అభిప్రాయము. అంతరిక్ష జలవనరులతో పాటుగా-భూభాగముల జల సమృధ్ధికి ,నియంత్రణకు సమర్థునిగానుసన్నుతిస్తారు.

ఈశానాయ నమః ************* " ఈశానా సర్వ విద్యానాం ఈశ్వరః సర్వభూతానాం" శుధ్ధస్పటిక సంకాశుడు,ఈశాన్యదిక్పాలకుడు ,అష్టవసువులలో ఒకడైన ఈశానుని,పంచబ్రహ్మలలో నొకరిగా ఐత్తరీయ అరణ్యకము కీర్తిస్తోంది. వాక్ప్రదాతయైన ఈశానుని రూపము ఒకసారి స్వేతవృషభవాహన మూర్తిగా కొన్నిచోట్లను,పద్మాసన ధ్యానమూర్తిగా మరికొన్ని చోట్లను దర్శనమిస్తుంటుంది. త్రిశూలధారిగా ఒకసారి/ఖట్వాంగధారియై మరొకసారి,గొడ్దలితో ఇంకొకసారి అవిద్యను ఖండిస్తూ,మన వాక్కును,శబ్దమును,శ్రవణమును సంరక్షిస్తుంటాడు. విశ్వాత్మకుని వామనేత్రము నుండి ప్రభవించినట్లు కొందరి నమ్మిక.లింగపురాణము ఈశానుని సర్వాంతర్యామిగా సన్నుతిస్తున్నది.